BMC Shiv Sena UBT: अर्धी मुंबई अजूनही ठाकरेंच्याच हाती! पालिकेत सत्ता येऊनही महायुतीचं टेन्शन का वाढलं?

मुंबई महानगरपालिकेत एकूण १८ प्रभाग समित्या आहेत. महायुतीने बहुमताचा आकडा पार केला असला तरी, वॉर्डनिहाय समीकरणे पाहता ८ प्रभाग समित्यांवर ठाकरे गटाचे नगरसेवक बहुमतात आहेत. याचा अर्थ असा की, रस्ते, पाणी, कचरा आणि आरोग्य यांसारख्या स्थानिक प्रश्नांवर निर्णय घेण्याचे अधिकार या प्रभाग समित्यांच्या अध्यक्षांकडे असतील, जिथे ठाकरेंची सत्ता असेल. मुंबई महापालिकेच्या विकासकामात प्रभाग समिती महत्त्वाची भूमिका बजावतात. मुंबईतील ८ प्रभाग समितीवर ठाकरेंचा प्रभाव असणार आहे. तर, ८ नगरसेवक असणाऱ्या एमआयएमकडे एक प्रभाग समिती असणार आहे. तर, प्रभागात समसमान संख्याबळ असल्याने चिठ्ठीद्वारे प्रभाग समिती अध्यक्ष निवडला जाणार आहे.

भाजप आणि शिवसेना (शिंदे गट) महायुतीचा महापौर जरी पालिकेच्या मुख्यालयात बसला, तरी स्थानिक पातळीवरील विकासकामांच्या फाईल्स मंजूर करताना त्यांना ठाकरेंच्या प्रभाग अध्यक्षांशी संघर्ष करावा लागणार आहे. विशेषतः मुंबई शहर आणि उपनगरातील महत्त्वाच्या विभागांमध्ये ठाकरे गटाचे वर्चस्व असल्याने महायुतीला प्रत्येक कामासाठी 'तडजोड' करावी लागण्याची शक्यता आहे.

पालिकेत सत्ता नसतानाही अर्ध्या मुंबईवर वर्चस्व राखण्यात उद्धव ठाकरे यशस्वी होताना दिसत आहेत. यामुळे आगामी काळात महापौरांच्या घोषणा आणि प्रभाग समितीची अंमलबजावणी यामध्ये मोठा राजकीय पेच पाहायला मिळू शकतो.