BMC News: आता ५०० नाही, ७०० फुटांपर्यंतच्या घरांचा टॅक्स माफ! मुंबईकरांना बीएमसीचं गिफ्ट, महापालिकेत प्रस्ताव मंजूर

मुंबईत आतापर्यंत केवळ ५०० चौरस फुटांपर्यंतच्या घरांना मालमत्ता करातून सूट मिळत होती. मात्र, वाढती महागाई आणि मुंबईकरांची गरज लक्षात घेता ही मर्यादा ७०० चौरस फुटांपर्यंत वाढवण्याची मागणी होत होती. शिवसेना (ठाकरे गट) नेते यशोधर फणसे यांनी मांडलेल्या या प्रस्तावाला सभागृहात सर्वसंमतीने मंजुरी देण्यात आली. यामुळे ५०० ते ७०० चौरस फुटांच्या दरम्यान घर असलेल्या मुंबईकरांचे टॅक्सचे पैसे वाचणार आहेत. त्याशिवाय, मुंबईतील जुन्या चाळी, इमारती यांच्या पुनर्विकासातही हा निर्णय महत्त्वाचा ठरणार आहे.

या सवलतीमुळे मुंबईकरांना मोठा दिलासा मिळणार असला तरी, महानगरपालिकेच्या महसुलात मोठी घट होणार आहे. प्राथमिक अंदाजानुसार, या निर्णयामुळे पालिकेच्या तिजोरीला वार्षिक सुमारे ७०० कोटी रुपयांचा फटका बसू शकतो. मात्र, जनहिताचा विचार करून हा निर्णय घेण्यात आला आहे.

सभागृहाने प्रस्ताव मंजूर केला असला तरी, तो लागू होण्यासाठी काही प्रशासकीय टप्पे बाकी आहेत. हा प्रस्ताव आता विभागीय अधिकारी आणि विधी व कायदे विभागाकडे पाठवला जाईल. सर्व कायदेशीर पडताळणी पूर्ण झाल्यानंतर अंतिम मंजुरीसाठी तो महानगरपालिका आयुक्तांकडे जाईल. आयुक्तांच्या स्वाक्षरीनंतर अधिकृत परिपत्रक निघेल आणि मुंबईकरांना या सवलतीचा प्रत्यक्ष लाभ मिळण्यास सुरुवात होईल.