अपघाताने कुंकू पुसलं, 2 वर्षांच्या लेकीचं पितृछत्र हरपलं, भिवंडीतील तिसरी घटना, अपघाताचा VIDEO

भिवंडी : मुंबईजवळील भिवंडीमध्ये अपघाताची मालिका काही केल्या कमी होत नाही. रस्त्यावर झाले खड्डे आणि त्यात बेशिस्त वाहन चालवणाऱ्यांमुळे निष्पाप लोकांचा बळी जात आहे. अशातच भिवंडी वडपे मार्गावर झालेल्या अपघातात एका तरुणाचा उपचारादरम्यान मृत्यू झाला. भरधाव कारने या तरुणाला ४० ते ५० फूट फरफटत नेलं होतं. या घटनेचा व्हिडीओ आता समोर आला आहे.

दरम्यान, भिवंडीत याआधीही अशाच घटना घडल्या होत्या. मुंबई-नाशिक महामार्गावरील डोहळे गावच्या हद्दीत 5 सप्टेंबरला झालेल्या अपघातात बाप लेकीचा घटनास्थळी मृत्यू झाला होता. मुंबई नाशिक महामार्गावरील भिवंडी तालुक्यातील डोहळे गावाचे हद्दीत साईधाम लॉजिस्टनसमोर मुंबईवरून नाशिकच्या दिशेने जाणाऱ्या दुचाकी स्वारीला पाठीमागून येणाऱ्या ट्रकने धडक दिली होती. या घटनेत शहापूर तालुक्यातील सरलांबे गावातील राजेश अधिकारी (वय 39), मुलगी वेदिका अधिकारी (वय 11) या दोघा बापलेकीचा अपघातात दुर्दैवीरित्या मृत्यू झाल्याची घटना घडली होती.

तर दुसरी घटना ही १८ सप्टेंबर रोजी घडली होती. भिवंडी तालुक्यातील भोईरगाव हद्दीतील साईधाराजवळ ही घटना घडली. नाशिककडून मुंबईच्या दिशेने जाणाऱ्या कंटेनर ट्रकने दुचाकीला पाठीमागून जोरात धडक दिल्याने दुचाकीवरील सईम खोत (अंदाजे वय 48 वर्षीय)आणि मुलगी मरियम खोत ( अंदाजे वय 8 वर्षे) या बाप लेकीचा दुर्दैवी रित्या मृत्यू झाला होता. तर सुबी सहिम खोत ही गंभीर रित्या जखमी झाली असून तिच्यावर खाजगी रुग्णालयात उपचार सुरू आहेत. पडघ्या जवळील बोरिवली गावातील सहिम मकबूल खोत हे आपल्या पत्नी आणि मुलीसह दुचाकीवरून भिवंडीच्या दिशेने जात असताना, भोईर गावाच्या हद्दीतील साईधारा इथं पाठीमागून येणाऱ्या कंटेनरने दुचाकीला जोराची धडक दिली, या  अपघातात बापलेकीचा दुर्दैवी मृत्यू झाला. तर सुबी खोत या  गंभीररित्या जखमी असून त्याच्यावर खाजगी रुग्णालयात उपचार सुरू आहेत.