Sambhajinagar : बियरच्या डिलिव्हरी ट्रकचा भीषण अपघात, ड्राईव्हरचा जीव वाचवायचं सोडून नागरिकांनी पळवल्या बाटल्या, संतापजनक घटना!

मिळालेल्या माहितीनुसार, रांजणगाव रस्त्यावरून बियरची डिलिव्हरी घेऊन जाणारा एक ट्रक जात असताना हा अपघात झाला. रस्त्यावर अचानक समोर आलेल्या एका व्यक्तीला वाचवण्याच्या प्रयत्नात चालकाचा ताबा सुटला आणि ट्रक त्याच ठिकाणी पलटी झाला. हा अपघात इतका भीषण होता की, पलटी झाल्यामुळे ट्रकमधून रस्त्यावर बियरच्या बॉटलचा सडा पडला. यामुळे रस्त्यावर मोठ्या प्रमाणात काचेचे तुकडे आणि बियर सांडल्याचे चित्र दिसत होते.

दरम्यान, या घटनेनंतर जे दृश्य पाहायला मिळाले, ते अत्यंत धक्कादायक होते. ट्रकचा चालक केबिनमध्ये अडकलेला असताना आणि त्याला तातडीने मदतीची गरज असताना, मदतीसाठी धाव घेण्याऐवजी काही नागरिकांनी बाटल्या पळवण्यावर जोर दिला. रस्त्यावर पडलेले बियरचे बॉक्स पळवण्यासाठी लोकांनी एकच झुंबड केली. अडकलेल्या चालकाला वाचवायचे सोडून, लोक बियर घेऊन पळताना दिसत होते. या विचित्र घटनेमुळे माणुसकीला काळीमा फासल्याचे बोलले जात आहे. सुदैवाने, या अपघातात मोठी मनुष्यहानी झाल्याची माहिती नाही, अशी माहिती मिळाली आहे.

दरम्यान, या घटनेनंतर माणुसकी संपली की काय? असा सवाल विचारला जात आहे.