भाडेकरू बनून यायचे अन् मालकाचाच गेम करायचे; ‘बंटी-बबली’चे कारनामे पाहाल, तर धक्का बसेल!

छत्रपती संभाजीनगर : भाड्याने घर घेण्याच्या बहाण्याने घरमालकाचा विश्वास जिंकून त्यांना लुटणाऱ्या एका सराईत 'बंटी-बबली' दांपत्याला वाळूज पोलिसांनी अखेर मुंबईतील भांडूप येथून अटक केली आहे. आरोपी दांपत्याने वाळूजमधील एका घरात अवघ्या महिनाभरासाठी भाड्याने मुक्काम केला. घरमालकाचा विश्वास संपादन केल्यानंतर त्यांनी घरातून सुमारे 65 हजार रुपये रोख आणि दागिने चोरून पलायन केले होते. या प्रकरणाचा तपास सुरू असताना पोलिसांच्या हाती आरोपींचा ठावठिकाणा लागला आणि भांडूप येथे जाऊन नवनीत मधुकर नाईक (वय 45) व त्याची पत्नी स्मिता नाईक (वय 41) यांना अटक करण्यात आली.