चूक कुणाची? एकाची कार दुसऱ्याला विकली अन् चालवताना तिसऱ्याचा मृत्यू, छ. संभाजीनगरात धक्कादायक प्रकार

‎साजापूर परिसरातील 17 वर्षीय यश (नाव बदलले) हा 9 जानेवारी रोजी करोडी शिवार परिसरात कार चालवत होता. तेव्हा त्याने वेगात जाऊन रस्त्यावर उभ्या असलेल्या वाहनाला धडक दिली. या अपघातात तो गंभीर जखमी झाला आणि उपचारादरम्यान त्याचा मृत्यू झाला.

‎या घटनेनंतर करण्यात आलेल्या तपासात आणि साक्षीदारांच्या जबाबांमध्ये समोर आले की, संबंधित कार शेख लतिफ शेख अब्दुल रहेमान (वय 56) यांच्या मालकीची होती. त्यांनी 16 डिसेंबर 2025 रोजी ती कार नंदनवन कॉलनीतील विजय गनराज यांना विकली होती. त्यानंतर 17 डिसेंबर रोजी ही व्यवहार प्रक्रिया पूर्ण झाली. पुढे 9 जानेवारी रोजी हीच कार ऋषिकेश येवतकरकडे होती आणि त्याने आपल्या परिचयातील अल्पवयीन यशला ती चालविण्यास दिली. त्यातून हा अपघात झाला आणि यशचा जीव गेला.

‎या प्रकरणात शासनाच्या वतीने पोलिस अंमलदार विठ्ठल खंडागळे यांनी दिलेल्या तक्रारीवरून ऋषिकेश येवतकर तसेच संबंधित प्रकरणात यशविरुद्ध गुन्हा नोंदविण्यात आला आहे. या घटनेचा पुढील तपास पोलिस उपनिरीक्षक संदीप वाघ करत आहेत.

‎या कलमान्वये दोषी आढळल्यास तीन वर्षांपर्यंत कारावास किंवा 25 हजार रुपयांपर्यंत दंड, अथवा दोन्ही शिक्षा होऊ शकतात. यासोबतच संबंधित वाहनाची नोंदणी निलंबित करण्याची तरतूदही आहे.