गणेशोत्सवात ढोल-ताशांचा आवाज घुमतो, पण तुम्हाला माहितीये का कुठं स्वस्तात मिळतो?

छत्रपती संभाजीनगर : गणेशोत्सवात ढोल-ताशाचा गजर जणू ठरलेलाच असतो. अनेकजण या काळात ढोल, ताशा, ढोलकी, डमरू आदी वाद्यांची खरेदी करत असतात. छत्रपती संभाजीनगरमधील पैठण गेट परिसरात ही वाद्य अगदी स्वस्तात मिळतात. येथील बॉम्बे हे दुकान या वाद्यांसाठी प्रसिद्ध असून ते स्वत: बनवून वाद्यांची विक्री करतात. गेल्या चार पिढ्यांची ही परंपरा आता शेख रफिक हे जपत आहेत.

छत्रपती संभाजीनगर शहरातील पैठण गेट परिसरात बॉम्बे हे दुकान आहे. या दुकानांमध्ये ढोल, ताशा, ढोलकी, मृदुंग, तबला आणि पखवाज हे सर्व साहित्य उपलब्ध आहे. तसंच हे सर्व साहित्य रफिक शेख यांचं कुटूंब स्वत: तयार करतं. गेल्या चार पिढ्यांपासून ते हेच काम करत आहेत. मराठवाडा आणि इतर भागातूनही वाद्यांच्या खरेदीसाठी लोक इथे येत असतात.