पालकांनो सावधान! 12 महिन्याच्या बाळानं जेली बॉल गिळला, आतड्यात फुगला अन् पुढे जे घडलं...

आतड्यात अडथळा निर्माण झाल्यामुळे बाळाला हिरव्या-पिवळ्या रंगाच्या उलट्या सुरू झाल्या आणि त्याची प्रकृती खूपच खालावली. श्वास थांबण्याची वेळ आल्याने घाबरलेल्या पालकांनी तातडीने त्याला बालरोगतज्ज्ञ डॉ. राजगोपाल तोतला यांच्याकडे आणले. बाळाचे पोट नेहमीपेक्षा चार पटीने फुगले होते आणि ते अत्यवस्थ होते.

डॉ. तोतला यांनी त्वरित प्राथमिक चाचण्या करून तातडीने शस्त्रक्रिया करण्याचा निर्णय घेतला. डिहायड्रेशन कमी करण्यासाठी सलाईन व औषधे देऊन बाळाला स्थिर करण्यात आले. दुसऱ्या दिवशी पोट उघडल्यावर त्यांना लहान आतड्यांमध्ये सूज आणि अडथळा दिसला. संपूर्ण 24 फुटांची आतडी तपासल्यावर एका विशिष्ट ठिकाणी काहीतरी अडकल्याचे लक्षात आले.

अडीच तासांच्या अथक शस्त्रक्रियेनंतर, अडकलेल्या जागेवर चिरा मारून 3 सेंटीमीटरचा फुगलेला जेली बॉल यशस्वीपणे बाहेर काढण्यात आला. बॉल बाहेर पडताच साचलेले मलही बाहेर पडले. शस्त्रक्रियेनंतर बाळाला नऊ टाके घालण्यात आले आणि तीन दिवस अतिदक्षता विभागात (ICU) ठेवण्यात आले. डॉ. तोतला यांना सहयोगी शल्यचिकित्सक डॉ. अर्जुन पवार आणि भूलतज्ज्ञ डॉ. श्रीगोपाल भट्टड यांचे मोलाचे सहकार्य लाभले.