नायब तहसिलदाराची मुलगी इथं शिकते, छ. संभाजीनगरमधील महानगरपालिकेची आदर्श शाळा, अशा आहेत सुविधा

छत्रपती संभाजीनगर : आपल्या मुलांनी चांगल्या शाळेमध्ये शिकावं ही प्रत्येक पालकांची इच्छा असते. त्यासाठी पालक हे कितीही फीस भरण्यासाठी तयार असतात. अनेकांचा ओढा हा खासगी शाळेकडे दिसते. मात्र, याला छत्रपती संभाजी नगर शहरातील महानगरपालिकेची शाळा ही अपवाद आहे. प्रियदर्शनी ही शाळा एक आदर्श शाळा असून या शाळेमध्ये सर्व सोयीसुविधा आहेत.

छत्रपती संभाजीनगर शहरात महानगरपालिकेची केंद्रीय प्राथमिक व माध्यमिक शाळा प्रियदर्शनी ही मयुरबन कॉलनी गादिया विहार याठिकाणी शाळा आहे. या शाळेत सर्व मोल मजुरी करणार्‍यांची मूले शिकण्यासाठी येतात. या शाळेमध्ये विद्यार्थ्यांसाठी सर्व सोयीसुविधा या उपलब्ध आहेत. शाळेमध्ये प्रशस्त कम्प्युटर लॅब आहे. त्यासोबतच वर्गात शिकवण्यासाठी डिजिटल बोर्डदेखील आहेत. शाळेत विद्यार्थ्यांसाठी बचत बँकदेखील शाळेने सुरू केलेली आहे. तसेच शाळेमध्ये विद्यार्थ्यांसाठी ग्रंथालयही आहे. याठिकाणी सर्व पुस्तके मुलांसाठी वाचण्यासाठी ठेवण्यात आले आहेत.

या शाळेत सर्व मोलमजुरी करणाऱ्या पालकांची मुले ही शिकण्यासाठी येतात. पण त्यासोबत शाळेमध्ये उच्चभ्रू वर्गातील जे पालक आहेत, त्यांची मुलेही शाळेत शिकण्यासाठी येतात. या शाळेमध्ये नायब तहसीलदाराची मुलगीही शिक्षण घेते. तसंच शाळेमध्येच सीबीएससी पॅटर्न आहे. यामध्ये प्रवेश घेण्यासाठी पालकांच्या अक्षरशः रांगा लागतात, असं येथील मुख्याध्यापक संजीव सोनार यांनी सांगितले.

मी पहिल्यांदा टीव्हीवर कॉम्प्युटर पाहिलं होतं. मला माहिती नव्हतं की, कॉम्प्युटर कसा असतो, कसं काम करतं, पण आमच्या शाळेतील शिक्षकांनी आमच्यासाठी कॉम्प्युटर लॅब सुरू केली आणि याठिकाणी आम्हाला कॉम्प्युटर हाताळायला शिकवले. आता मला कॉम्प्युटर हाताळता येते, त्यामुळे मला खूप आनंद वाटतो, अशी प्रतिक्रिया ईश्वरी नरवडे या विद्यार्थिनीने दिली.

तर मला शाळेत यायला खूप आवडतं, कारण की आमच्या शाळेमध्ये कॉम्प्युटर आहे. याठिकाणी मिळून चित्र काढतो. वेगवेगळ्या गोष्टी शकतो. तसेच आमच्या शाळेमध्ये ग्रंथालयही आहे. याठिकाणी पण मला छान अशी गोष्टींचे पुस्तके वाचायला मिळतात. त्यामुळे मला शाळेत जास्त वेळ थांबायला खूप आवडतं, असे साईराज गवळी या विद्यार्थ्याने म्हटले.