छत्रपती संभाजीनगरात निवृत्त प्राध्यापकाची निर्घृण हत्या, ज्यांच्यावर विश्वास ठेवला त्यांनीच दिला दगा, पार्टीला बोलवलं अन्...

मिळालेल्या माहितीनुसार, मृत प्राध्यापक लोंढे आणि मुख्य आरोपी विशाल राठोड यांच्यात सुमारे ५० लाख रुपयांचा आर्थिक व्यवहार झाला होता. आरोपींनी 'खतरों के खिलाडी' सारखा एक मोठा टीव्ही रिअॅलिटी शो तयार करून त्यातून भरघोस नफा कमावण्याचं आमिष लोंढे यांना दाखवलं होतं. या कामासाठी त्यांनी मोठी रक्कम घेतली, मात्र बराच काळ उलटूनही त्यांनी कोणताही शो सुरू केला नाही. यामुळे प्राध्यापक लोंढे यांनी आपल्या पैशांसाठी आरोपींकडे तगादा लावला होता.

खुनानंतर पोलिसांना गुंगारा देण्यासाठी आरोपींनी सिनेस्टाईल प्लॅन केला. लोंढे जिवंत असल्याचा भास निर्माण करण्यासाठी आरोपींनी त्यांचा मोबाईल बराच वेळ ऑन ठेवला आणि तो शहराच्या वेगवेगळ्या भागात फिरवला. एवढंच नव्हे तर मृतदेहाची विल्हेवाट लावण्यासाठी आरोपींनी एका जेसीबी चालकाला गाठलं. गेवराई तांड्या परिसरात गुप्तधन असल्याचा बनाव रचून त्यांच्याकडून दोन खड्डे खणून घेतले आणि पहाटेच्या सुमारास मृतदेह तिथे पुरला.

६ फेब्रुवारी २०२६ रोजी लोंढे बेपत्ता असल्याची तक्रार दाखल झाली होती. गुन्हे शाखेने तांत्रिक विश्लेषण आणि CCTV फुटेज तपासले असता विशाल राठोड आणि आकाश पवार यांच्या जबाबात तफावत आढळली. पोलिसांनी विशाल राठोडला विश्वासात घेऊन कसून चौकशी केली असता त्याने खुनाची कबुली दिली. या प्रकरणी पोलिसांनी विशाल राठोड, आकाश पवार आणि करण आडे या तिघांना अटक केली आहे. आर्थिक व्यवहारातून अशाप्रकारे एका निवृत्त प्राध्यापकाची हत्या झाल्याने परिसरात एकच खळबळ उडाली आहे.