रक्षांबंधनादिवशी कपाट उघडलं अन् पायाखालची जमीनच सरकली! आईनेच 19 वर्षाच्या मुलीविरुद्ध केली तक्रार दाखल, असं काय पाहिलं?

ही घटना आहे हडको भागात राहणाऱ्या एका 58 वर्षीय सेवानिवृत्त महिलेची... आरोग्य विभागात नोकरी करून तिने आपल्या मुलांसाठी आणि संसारासाठी 14 ते 15 तोळे सोन्याचे दागिने जमा केले होते. या दागिन्यांसोबतच घरात 1 लाख 55 हजार रुपयांची रोकडही होती. आपल्या मुलामुलींच्या भविष्यासाठी ती प्रत्येक गोष्ट जपून ठेवत होती.

9 ऑगस्ट रोजी रक्षाबंधन होते. त्यावेळी तिच्या मुलाने सोन्याची अंगठी मागितली. जेव्हा तिने कपाट उघडून पाहिले, तेव्हा तिच्या पायाखालची जमीनच सरकली. कपाटातील डब्यात एकही दागिना नव्हता आणि सोबत असलेली 1 लाख 55 हजार रुपयांची रोकडही गायब होती. सुमारे 14.1 तोळ्यांचे दागिने आणि मोठी रक्कम चोरीला गेल्याने तिला मोठा धक्का बसला. तिने मुलाला विचारले, पण त्याला काहीच माहीत नव्हते. अकरावीत शिकणाऱ्या आपल्या मुलीकडे विचारपूस केली, तेव्हा ती मात्र गडबडून गेली. आईने विश्वासात घेऊन विचारल्यावर तिने आपला मित्र मंगेश विलास पंडित याला दागिने व पैसे दिल्याचे कबूल केले.

मुलीने सांगितल्यावर आईने तात्काळ मंगेशकडे जाऊन चौकशी केली, पण त्याने दागिने आपल्याकडे नसल्याचे सांगितले. आपल्याच पोटच्या मुलीने केलेल्या या कृत्यामुळे आईचे मन दुखावले गेले. आयुष्यभर जपलेली कमाई एका क्षणात संपल्याचे पाहून तिला मोठा धक्का बसला. अखेर, तिला बेगमपुरा पोलीस ठाण्यात जाऊन मंगेश आणि आपल्याच मुलीविरुद्ध चोरीची तक्रार दाखल करावी लागली. पोलिसांनी मंगेशला अटक केली आहे.