संभाजीनगरमध्ये मध्यरात्री भयंकर कांड, पती घरात झोपला होता, पत्नीने तोंडावर ठेवली उशी, प्रियकराने गळा आवळला

फिर्यादी सुरेश खालापुरे यांनी दिलेल्या फिर्यादीनुसार, ते रिक्षाचालक असून त्यांना तीन मुली व एक मुलगा आहे. त्यांच्या दोन्ही मुलींचे लग्न झालेले आहे. सुरेश यांची आरोपी पत्नी ही वाळूज औद्योगिक वसाहतीमध्ये एका कंपनीत नोकरी करत होती. काही दिवसांपूर्वी तिने काम सोडून दुसऱ्या ठिकाणी काम सुरू केले. दरम्यान, २ ऑगस्टला खालापुरे ११ वाजेच्या सुमारास पलंगावर झोपलेले असताना अचानक त्यांच्या तोंडावर उशी ठेवून तोंड दाबण्याचा प्रयत्न केला आणि राजू खैरे याने ओढणीने गळा आवळण्याचा प्रयत्न केला.

आवाज घराबाहेर जाऊ नये म्हणून शीलाने वाढवला टीव्हीचा आवाज

खालापुरे यांनी जेवण केल्यानंतर पत्नी आरोपी शीला हिने घराचा दरवाजा उघडा ठेवून प्रियकर राजूला घरात बोलावले. घरात राजू आल्यानंतर शीलाने दरवाजा ढकलून घेतला. त्यानंतर घरातील आवाज बाहेर जाऊ नये आणि संशय येऊ नये म्हणून तिने टीव्हीचा आवाज वाढवून ठेवला. पण ज्यावेळी हा हत्येचा प्रयत्न झाला, तेव्हा सुरेश यांनी मदतीसाठी आरडाओरड केली. खालापुरे यांचा आवाज ऐकून त्यांचे घरमालक तातडीने घरात दाखल झाले आणि सुरेश यांचा जीव वाचवला.

पलंग आणि भिंतीच्या 'मध्ये' पडल्यामुळे वाचला जीव

खालापुरे यांची हत्या करण्याचा प्रयत्न करत असताना त्यांनी प्रतिकार करण्यास सुरुवात केली. या झटापटीमुळे ते पलंग आणि भिंतीच्या मध्ये असलेल्या निमुळत्या भागात पडले. यामुळे आरोपींना त्यांचा गळा आवळता आला नाही. आरडाओरड केल्यामुळे वरच्या मजल्यावर राहणारे घरमालक विशाल जाधव तत्काळ खालापुरे यांच्या मदतीला धावले. या प्रकारामुळे गल्लीतील नागरिक जमा होत आरोपी राजूला पकडत नागरिकांनी चोप दिला. दरम्यान, संधी साधत शीला ९ वर्षांच्या मुलाला घेऊन घटनास्थळावरून पसार झाली.