पृथ्वीराज चव्हाणांच्या होमग्राऊंडमध्ये होणार मोठा भूकंप, भाजपनं लावली फिल्डिंग

आगामी स्थानिक स्वराज्य संस्थांच्या निवडणुकीच्या पार्श्वभूमीवर माजी मुख्यमंत्री आणि काँग्रेसचे ज्येष्ठ नेते पृथ्वीराज चव्हाण यांना मोठा धक्का बसला आहे. पृथ्वीराज चव्हाणांची अत्यंत निष्ठावंत मानले जाणारे नेतेच आता त्यांची साथ सोडणार असल्याची माहिती समोर आली आहे. हा चव्हाण यांच्यासाठी होमग्राऊंडमध्ये बसलेला मोठा धक्का मानला जातोय. पुढील आठवड्यात हा पक्ष प्रवेश होणार असल्याची माहिती भाजप आमदार अतुल भोसले यांनी दिली.

सरसेनापती हंबीरराव मोहिते यांचं गाव असलेल्या तळबीड गावात काँग्रेसचे माजी मुख्यमंत्री पृथ्वीराज चव्हाण यांना मानणाऱ्या सरपंच, सदस्यांनी ग्रामविकास मंत्री जयकुमार गोरे, आमदार अतुल भोसले, आमदार मनोज घोरपडे यांच्या उपस्थितीत भाजपात पक्षप्रवेश केला. या पक्षप्रवेशामुळे पृथ्वीराज चव्हाण यांना धक्का मानला जात असून पुढील आठवड्यात भूकंप करणार असल्याचे जिल्हाध्यक्ष आमदार अतुल भोसले यांनी सांगितले आहे.

मलकापूर शहराचे माजी उपनगराध्यक्ष आणि पृथ्वीराज चव्हाणांचे निकटवर्तीय, निष्ठावंत मनोहर शिंदे यांचा पक्ष प्रवेश या भूकंपात निश्चित मानला जात आहे. साताऱ्यात आगामी स्थानिक स्वराज्य निवडणुकांच्या अगोदर काँग्रेसचा गड ढासळत आहे. मात्र तब्बेत बरी नसल्याने पृथ्वीराज चव्हाण दिल्लीत उपचार घेत आहेत. ते दिल्लीत असताना त्यांच्या बालेकिल्ल्यात भाजकडून धक्के दिले जात आहेत. त्यामुळे ते साताऱ्यात कधी परतणार? असा सवाल कार्यकर्ते विचारत आहेत.