धाराशिवमध्ये पावसाचं तुफान! नद्या दुथडी, गावांचा संपर्क तुटला, शेती पिकांचं नुकसान

धाराशिव जिल्ह्यात ऑगस्ट महिन्यात तीन आठवडे उघडीप दिलेल्या पावसाने आज सकाळपासून जोरदार हजेरी लावली. रविवारी सकाळपासून पडणाऱ्या पावसामुळे शेतकरी सुखावला आहे. या पावसाने ऊस, सोयाबीन पिकांना दिलासा मिळाला. मात्र, काढणीला आलेल्या उडीद आणि मूग या पिकांना मोठा फटका बसणार आहे.

धाराशिव जिल्ह्यातील काही नद्यांना पूर आलाय. कळंब तालुक्यातून वाहणारी तेरणा नदी दुथडी भरून वाहू लागलीये. त्यामुळे दहिफळ आणि परतापूर या दोन गावांचा संपर्क तुटला. पुलावरून पाणी वाहत असल्याने शेतात गेलेल्या नागरिकांना घराकडे येण्याचा मार्ग बंद झाला. बैलपोळ्याच्या सणाच्या पार्श्वभूमीवर बैलांची खंदे मळणी करण्यासाठी शेतात गेलेले शेतकरी शेतातच अडकले.