ना माती ना POP, इथं 77 वर्षांपासून पूजतात चंदनाची मूर्ती! पर्यावरणपुरक गणेशोत्सवाची अनोखी परंपरा

धाराशिव: सध्याच्या काळात गणेशोत्सवासाठी प्लास्टर ऑफ पॅरिसच्या गणेशमूर्ती मोठ्या प्रमाणात बनवल्या जातात. तर काहीजण पर्यावरणपुरक गणेशोत्सवाला प्राधान्य देत मातीच्या गणेशमूर्तींना प्राधान्य देतात. परंतु, धाराशिवमधील मुरुम येथे गेल्या 77 वर्षांपासून पर्यावरणपुरक गणेशोत्सवाची अनोखी परंपरा जोपासली आहे. इथं माती किंवा पीओपी नाही तर चक्क चंदनाच्या लाकडापासून बनवलेल्या एकाच गणेशमूर्तीची पूजा केली जाते.

उमरगा तालुक्यातील मुरूम येथे मध्यवर्ती अशोक चौक गणेश मंडळाची स्थापना 1947 झाली. त्यावेळी मराठवाडा हे निजाम सरकारच्या हैद्राबाद संस्थान मध्ये होते. हा परिसर स्वतंत्र भारतात आणखी विलीन झाला नव्हता. त्यामुळे याठिकाणी सामाजिक कार्यक्रम मोठ्या प्रमाणात साजरे केले जात नव्हते. तेव्हा लोकांनी एकत्र येऊन एखादा सार्वजनिक कार्यक्रम सुरू करण्याची कल्पना पुढे आली आणि शहरातील त्याकाळी मुख्य बाजार पेठ असलेल्या अशोक चौक येथील व्यापारी बांधवांनी एकत्र येत गणेश मंडळाची स्थापना केली.