शेतकऱ्यांसाठी महत्त्वाची बातमी! फळबाग लागवड योजनेसाठी अर्ज कसा करावा?, संपूर्ण माहिती एका क्लिकवर..

धाराशिव : सरकारच्या वतीने शेतकऱ्यांसाठी विविध प्रकारच्या योजना या राबवल्या जातात. मात्र, अनेकांना या योजनांबाबत माहिती नसते. कुठे अर्ज करावा, काय कागदपत्रे हवीत, प्रक्रिया कशी असते, याबाबत काहीच माहिती नसते, त्यामुळे शेतकरी पात्र असूनही त्याला संबंधित योजनेचा लाभ मिळत नाही. आज अशाच एका योजनेबाबत आपण जाणून घेणार आहोत. शेतकऱ्यांना या योजनेचा कसा फायदा होतो, याबाबत लोकल18 च्या टीमने घेतलेला हा विशेष आढावा.

केंद्र शासनाकडून अल्पभूधारक शेतकऱ्यांसाठी सरकारची ही फळबाग लागवड योजना राबवली जाते. महात्मा गांधी राष्ट्रीय ग्रामीण हमी योजनेअंतर्गत फळबाग लागवड करता येते. ही योजना केंद्र शासनाकडून राबवण्यात येते.

फळबाग लागवडीतून शेतीपूरक व्यवसायात वाढ करणे, उत्पादनात वाढ करणे, शेतकऱ्यांना शाश्वत रोजगाराची निर्मिती करून देणे आणि फळबाग लागवडी खालील क्षेत्रात वाढ करणे ही या योजनेची प्रमुख उद्दिष्ट आहे. महाराष्ट्रातील 34 जिल्ह्यातील शेतकऱ्यांना या योजनेचा लाभ घेता येतो.

आंबा, काजू, पेरू, डाळिंब, संत्रा, मोसंबी, कागदी लिंबू ,नारळ, बोर, सीताफळ, आवळा, चिंच, कवट, जांभूळ कोकम, फणस, अंजीर, द्राक्ष, केळी, सुपारी, शेवगा, हादगा, कडुलिंब बांबू, कडीपत्ता, औषधी वनस्पती व फळ पिकांची लागवड करता येते. फुल पिकातून गुलाब, मोगरा, निशिगंधा, सोनचाफा या फुल पिकांची लागवड करता येते. तर मसाला पिकातून लवंग, दालचिनी, जायफळ, मिरी यांची लागवड करता येते.

या योजनेची अंमलबजावणी ही जिल्हाध्यक्ष कृषी अधिकारी, उपविभागीय कृषी अधिकारी, तालुका कृषी अधिकारी आणि मंडळ कृषी अधिकारी यांच्यामार्फत केले जाते.