गोंदिया : लोकेश यादव यांच्यावर गोळीबार प्रकरणी मोठी अपडेट, चौघेजण ताब्यात

माजी नगरसेवक लोकेश यादव यांच्यावर करण्यात आलेल्या गोळीबारात त्यांच्या कमरेला उजव्या बाजूला गोळी लागली होती. गोळीबारात जखमी झालेल्या लोकेश यादव यांना नागपूरच्या खाजगी रुग्णालयात दाखल करण्यात आले होते. त्यांच्यावर यशस्वी शस्त्रक्रिया करण्यात आली. आता त्यांची प्रकृती धोक्याबाहेर आहे.

लोकेश यादव यांच्यावर गोंदिया शहर पोलीस स्टेशनच्या हद्दीत असलेल्या यादव चौक या ठिकाणी गोळीबार झाला होता. गोळीबारात जखमी झाल्यानंतर लोकेश यादव यांना उपचारासाठी शासकीय महाविद्यालयात दाखल केलं होतं. मात्र गंभीर जखमी असल्याने नागपूरच्या खासगी रुग्णालयात हलवण्यात आले. गोळीबाराच्या घटनेनंतर शहरात दहशतीचे वातावरण निर्माण झाले होते. या घटनेनंतर त्यांच्या समर्थकांनी रुग्णालय आवारात मोठी गर्दी केली आहे.

लोकेश यादव यांच्यावर तीन अज्ञातांनी हेमू कॉनलीजवळ गुरुवारी सकाळी अकरा वाजण्याच्या सुमारास गोळीबार केला होता. लोकेश यादव हे शिवसेना उद्धव बाळासाहेब ठाकरे गटाचे जिल्हाध्यक्ष पंकज यादव यांचे भाऊ आहेत. त्यांच्यावर गोळीबाराच्या घटनेनंतर गोंदियातील राजकीय वर्तुळात खळबळ उडाली आहे.