लोकराजाचा जन्मदिवस, कोल्हापूरकरांसाठी मोठी पर्वणी, शाहू महाराजांची दुर्मिळ छायाचित्रे, दुर्मिळ कागदपत्रांचे भरलं प्रदर्शन, VIDEO

राजर्षी छत्रपती शाहू महाराजांनी कोल्हापूर संस्थानची अधिकार सूत्रे स्वीकारल्यानंतर समाजाच्या सर्वांगीण विकासाला हातभार लावला होता. त्यामुळे या प्रदर्शनात प्रामुख्याने छत्रपती शाहू महाराजांचे दत्तक विधान, महाराजांचे राज्यारोहण, शाहूकालीन पत्रव्यवहार, शाहू महाराजांनी अस्पृश्य समाजाच्या उद्धारासाठी केलेले कार्य, दुष्काळी परिस्थितीत केलेले कार्य, शाहू महाराजांचे शैक्षणिक, सांस्कृतिक, सामाजिक, वैद्यकीय, कला व क्रीडा, प्रशासकीय इत्यादी क्षेत्रातील कार्य, पर्यावरण रक्षणाकरीता केलेले कार्य तसेच महाराजांनी राज्यकारभार करताना वेळोवेळी घेतलेले निर्णय इत्यादी विषयासंदर्भातील महत्वाची, निवडक कागदपत्रे ही शाहू कालीन दुर्मिळ छायाचित्रांसह याठिकाणी प्रदर्शित करण्यात आली आहेत.

या प्रदर्शनामध्ये राजर्षी छत्रपती शाहू महाराज यांची बालपणीची, विद्यार्थी दशेतील, विविध कार्यक्रम, उद्घाटन प्रसंगांची आणि कोल्हापुरातील अनेक विकास कामांवेळची दुर्मिळ छायाचित्रे पाहायला मिळत आहेत. यामध्ये एका पर्शियन कवीने राजर्षी शाहू महाराजांवर एक पर्शियन काव्य करून ते पुस्तक रूपाने प्रदर्शित केले होते. त्या पुस्तकामधील राजर्षी शाहू महाराजांचे वयाच्या 10 ते 12 व्या वर्षातले एक दुर्मिळ छायाचित्र देखील याठिकाणी पाहायला मिळते, असेही गणेशकुमार खोडके यांनी सांगितले आहे.

दरम्यान, हे प्रदर्शन दिनांक 26 ते 30 जून 2024 या पाच दिवसांच्या कालावधीत सकाळी 10 ते सायंकाळी 7.30 या वेळेत राजर्षी शाहू छत्रपती मेमोरियल ट्रस्ट, शाहू स्मारक भवन, दसरा चौक, कोल्हापूर येथे भरविण्यात आले आहे. प्रदर्शन सर्वांसाठी विनामुल्य खुले राहणार आहे. त्यामुळे कोल्हापूरकरांनी या प्रदर्शनाला नक्की भेट द्यावी, असे आवाहनही खोडके यांनी केले आहे.