राज्यातील तृतीय पंथियांचा पहिलाच Fashion Show, कोल्हापुरात दिसला अनोखा माहोल, Video

कोल्हापूर : इतरांपेक्षा नेहमीच कमी प्रसिद्धी आणि कमी मानसन्मान मिळालेला समाजातला एक घटक म्हणजे तृतीयपंथी होय. कोणत्याही स्पर्धेत, कार्यक्रमात तृतीयपंथीयांना सहसा समान वागणूक मिळत नाही. मात्र कोल्हापुरातल्या काही तृतीयपंथियांनी समाजातील इतर घटकांप्रमाणेच एक मोठा फॅशन शो आयोजित करून समाजात बरोबरीने जगत असल्याचे दाखवून दिले. राज्यातील पहिलाच तृतीयपंथीयांचा फॅशन शो कोल्हापुरात मोठ्या उत्साहात नुकताच आयोजित करण्यात आला होता. या फॅशन शोच्या माध्यमातून अनेक तृतीयपंथियांनी सहभाग नोंदवत इतिहास घडवला आहे.

दिनकरराव शिंदे समाजकार्य विभाग आणि मैत्री फाउंडेशन यांच्यावतीने कोल्हापुरात तृतीयपंथीय समुदायाचा फॅशन शो आयोजित करण्यात आला होता. नागाळा पार्क परिसरातील रोटरी क्लबच्या हॉलमध्ये हा सोहळा पार पडला. महाराष्ट्रातील विविध ठिकाणांसह गोवा आणि कर्नाटकातील स्पर्धकांनी देखील या स्पर्धेत सहभाग घेतला होता. यामध्ये रिया मयुरी आळवेकर हिने विजेतेपद पटकावले. यामध्ये सिंधुदुर्गची रिया मयुरी आळवेकर प्रथम, मिरजेच्या दीपा नाईक द्वितीय आणि पुण्याच्या दक्षता पाटील यांनी तृतीय क्रमांक पटकावला आहे.

दरम्यान, या अनोख्या स्पर्धेसाठी महाराष्ट्राच्या विविध भागातून आलेले तृतीयपंथी, मैत्री फौंडेशनच्या मयूरी आळवेकर, संग्राम संस्थेच्या माया गुरव, रोटरी क्लबचे सदस्य, समाजकल्याण तालुका समन्वयक सुरेखा डवर, कोल्हापूर जिल्हा देवदासी समाज संघटनेचे दत्ता पवार आदी उपस्थित होते.