बाप लेकाची पहिली भेट झालीच नाही! कोल्हापूरचा जवानाला वीरमरण, गाडी 500 फूट खोल दरीत कोसळली

सुनील यांचा 2 वर्षांपूर्वी विवाह गावातीलच आबाजी पाटील यांची कन्या स्वप्नाली यांच्याशी झाला होता. सहा महिन्यांपूर्वी ते गावावरून अरुणाचल येथे रुजू झाले होते. त्यानंतर पाच महिन्यांपूर्वीच त्यांना मुलगा झाला आहे. मुलाचे जावळ आणि गावची यात्रा असल्याने 12 मार्चला ते गावी येणार होते. परंतु, भूस्खलन झाले आणि तातडीच्या सेवांसाठी रजा रद्द करण्यात आली. त्यामुळे बाप लेकाची पहिली भेट अधुरीच राहिल्याने गावात हळहळ व्यक्त होतेय.

सुनील यांच्या घरची गरिबी होती. वडील वडापावची गाडी चालवत आपल्या कुटुंबाचा उदरनिर्वाह चालवत होते. अत्यंत संघर्षमय स्थितीत चिकाटी आणि मेहनतीने ते सैन्यात भरती झाले. सुनील यांचं प्राथमिक शिक्षण केंद्रीय प्राथमिक शाळा, शित्तूर तर्फ मलकापूर येथे, माध्यमिक शिक्षण माध्यमिक विद्यालय, शित्तूर तर बारावीचे शिक्षण हे समाज विकास विद्यालय, सागावला झाले. त्यांनी पदवीचं शिक्षण कळे (ता. पन्हाळा) येथे पूर्ण केले होते.