Lok Sabha Election : कोल्हापुरात वारं कुणीकडे? तयारी करूनही संभाजीराजेंनी का घेतली माघार? SPECIAL REPORT

शाहू महाराज छत्रपती यांना महाविकास आघाडीकडून कोल्हापूर लोकसभा मतदारसंघांमध्ये उमेदवार म्हणून उतरवले जात आहे. त्यामुळेच युवराज संभाजीराजे छत्रपती यांनी निवडणुकीच्या रिंगणातून माघार घेतली आहे. करवीरचे छत्रपती आणि आमचे वडील शाहू महाराज हे निवडणुकीच्या रिंगणात उतरणार आहेत आणि त्यांना निवडून आणणे आमची प्राथमिकता आहे. त्यामुळे आता माझ्या उमेदवारीचा प्रश्नच येत नाही अशी स्पष्ट भूमिका संभाजीराजे छत्रपती यांनी बोलून दाखवली.

इतकंच नाही तर शाहू महाराज यांच्या वयाबद्दल प्रश्न उपस्थित करणाऱ्यांना संभाजीराजे यांनी चांगलेच खडसावले आहे. शाहू महाराज यांचे वय विचारता तर मोदींचे वय किती आहे? असा सवाल देखील संभाजीराजे यांनी उपस्थित केला. तर महाराजांना नुसते आदर्श म्हणू नका तसे असेल तर निवडणूक बिनविरोध करा असे म्हणत हसन मुश्रीफ यांच्यासह महायुतीच्या नेत्यांना सतेज पाटील यांनी चांगलंच फटकारलं आहे.

संभाजीराजेंच्या भूमिकेबद्दल भाजपचे नेते धनंजय महाडिक यांनी आश्चर्य व्यक्त केलं आहे. संभाजीराजे यांनी लोकसभेची प्रचंड तयारी केली होती, त्यामुळे त्यांचे कार्यकर्ते देखील नाराज झाले असतील. मोदींची कार्यक्षमता संपूर्ण देशाला माहिती आहे. त्यामुळे कुणीच कुणाच्या वयाबद्दल बोलू नये असं प्रत्युत्तर धनंजय महाडिक यांनी संभाजीराजे यांना दिलं आहे. निवडणुकीसाठी अद्याप उमेदवार म्हणून कोणाचेही नाव पूढे आलेले नाही. या निमित्तानं राजकारण मात्र चांगलंच तापलं आहे.