Latur: लातूर कार जळीत कांड प्रकरणातल्या गणेशची दुसरी बाजू समोर, चक्रावून टाकणारं कारण

लातूर : कर्जाची रक्कम वसूल करण्यासाठी एका सावकाराने कर्जदाराला किडनी विकायला भाग पाडल्याची घटना समोर असताना एका फायनान्स कंपनीत काम करणाऱ्या तरुणाने घराचं कर्ज फेडण्यासाठी आणि १ कोटी रुपयांचा टर्म इन्शुरन्स लाटण्यासाठी एका निष्पाप व्यक्तीला जिवंत जाळलं. लातूरमधील कार जळीत कांडाने अवघा महाराष्ट्र हादरला. पण, आता या आरोपी गणेश चव्हाणाने हे कृत्य का केलं, याची माहिती समोर आली आहे.

औसा तालुक्यातील वानवडा येथील एका कारमध्ये जाळून मारणारा आरोपी गणेश गोपीनाथ चव्हाण (रा. विठ्ठल नगर, औसा) हा मागील काही काळापासून आर्थिक विवंचनेत होता. त्याच्यावर विविध कर्जांचं ओझं होतं. गणेश चव्हाणवर सुमारे  47 लाख रुपयांचं कर्ज होतं अशी माहिती समोर आली. त्याने एक फ्लॅट सुद्धा घेतला होता. तसंच इतरही कर्ज त्याच्यावर होतं. त्यामुळे त्याला दरमहा सुमारे 75 हजार रुपयांचा हप्ता भरावा लागत होता. डोक्यावर इतकं कर्ज झाल्यामुळे कर्जाच्या ताणामुळे तो आत्महत्या करण्याचाही विचार करत असल्याची माहिती पोलीस तपासात पुढे आली आहे.

पोलीस तपासानुसार, आरोपीने गोविंद यादव यांना गाडीत बसवून औसा टी-पॉईंट मार्गे पुढे नेलं. आरोपी गणेश चव्हाण याने गोविंद यादव यांना एका धाब्यावर दारू पाजवली, चिकन खाऊ घातलं. त्यानंतर दारूच्या नशेत असताना वानवडा पाटी–वानवडा रस्त्यावर नेलं. यादव झोपेत गेल्यानंतर आरोपीने गोविंद यादव यांना ड्रायव्हर सीटवर बसवून सीट बेल्ट लावला, तसंच त्याला बांधून ठेवलं आणि वाहनात ज्वलनशील साहित्य ठेवून कारला आग लावली. यावेळी आरोपीनं कारच्या पेट्रोल टाकीचं झाकण ही उघडं ठेवलं होतं.

14 डिसेंबर रोजी मध्यरात्री वाहन जळत असल्याची माहिती डायल 112 वर मिळाल्यानंतर औसा पोलिसांनी घटनास्थळी धाव घेतली. कारमध्ये अर्धवट जळालेला मानवी हाडांचा सांगाडा आढळून आला. सुरुवातीला अकस्मात मृत्यूची नोंद करण्यात आली होती. मात्र तपासात वाहन आरोपीच वापरत असल्याचे समोर आले.