Maharashtra Elections CM Eknath Shinde : CM एकनाथ शिंदेंचा मराठा आरक्षणावर मविआवर मोठा आरोप, म्हणाले...

मुख्यमंत्री एकनाथ शिंदे यांनी 'न्यूज18 लोकमत'ला एक्सक्लुझिव्ह मुलाखत दिली. विधानसभेच्या रणधुमाळीतील मुख्यमंत्र्यांनी आपल्या पहिल्याच मुलाखतीत शिवसेना आणि महायुतीच्या प्रचाराची दिशा स्पष्ट केल्याचे दिसून आले. मुख्यमंत्री एकनाथ शिंदे यांनी म्हटले की, महायुतीमध्ये जागा वाटपा समन्वयाने करण्यात आले आहे. लोकसभा निवडणुकीच्यावेळी विरोधकांकडून फेक नरेटिव्ह करण्यात आला. मात्र, सारखंसारखं फेक नरेटिव्ह करता येत नसल्याचेही मुख्यमंत्री एकनाथ शिंदे यांनी म्हटले. विरोधकांनी फक्त घोषणा केल्या. पण, राज्यातील योजनांना विरोधकांचा विरोध आहे. विरोधक या योजनेविरोधात कोर्टात गेले असल्याचा दावाही मुख्यमंत्री शिंदे यांनी केला. आम्ही कल्याणकारी योजना राबवल्याचेही त्यांनी म्हटले.

मुख्यमंत्री एकनाथ शिंदे यांनी मराठा आरक्षणाबाबत बोलताना त्यांनी सांगितले की, देवेंद्र फडणवीस मुख्यमंत्री असताना त्यांनी दिलेले मराठा आरक्षण हे उच्च न्यायालयात टिकले. पण, महाविकास आघाडीच्या सरकारला हे आरक्षण टिकवता आले नाही. याचा मराठा समाजाने विचार करावा असेही मुख्यमंत्री शिंदे यांनी म्हटले.

बळीराजासाठी पीक विमा सुरू केला असून शेतकऱ्यांना नुकसान भरपाई देणारं सरकार असल्याचे त्यांनी म्हटले. आम्हाला कॉमनमॅनला सुपरमॅन करायचंय असून आम्ही जे बोलतो ते करून दाखवतो असे मुख्यमंत्री एकनाथ शिंदे यांनी म्हटले.