Eknath Shinde : उपमुख्यमंत्रीपदासाठी Go Slow, एकनाथ शिंदेंच्या निर्णयाचे कारण काय?

बुधवारी, रात्रीच्या सुमारास देवेंद्र फडणवीस यांनी याच विषयावर एकनाथ शिंदे यांच्याशी जवळपास पाऊणतास चर्चा केली. या बैठकीत एकनाथ शिंदे यांनी आपल्या मागण्या फडणवीस यांच्यासमोर ठेवल्या. ⁠गृह खात्यासोबतच महसूल खाते, नगरविकास खाते आणि सार्वजनिक बांधकाम खाते मिळावीत अशी मागणी शिवसेनेने केली आहे. एकनाथ शिंदे यांनी केलेल्या मागणीमुळे निवडणुकीत प्रचंड बहुमत मिळूनही महायुतीमध्ये सत्ता वाटपाचा तिढा निर्माण झाला होता. बहुमत मिळूनही 13 दिवसांनी आता राज्यात नवीन सरकार स्थापन होणार आहे. या सरकारमध्ये एकनाथ शिंदे यांनी देखील शपथ घ्यावी असा आग्रह भाजपकडून सुरू होता. तर, दुसरीकडे शिवसेना शिंदे गटातील आमदारांनीदेखील अशीच मागणी केली.

महायुतीच्या सरकारमध्ये उपमुख्यमंत्रीपद स्वीकारण्यासाठी एकनाथ शिंदे यांनी गो स्लो धोरण अवलंबले असल्याची चर्चा सुरू आहे. महायुतीच्या सरकारमध्ये गृह खात्यासह इतर महत्त्वाची खाती मिळावीत, यासाठी एकनाथ शिंदे कमालीचे आग्रही आहेत. खाते वाटपाचा तिढा सुटण्याआधीच आपण उपमुख्यमंत्रीपद स्वीकारले आणि कॅबिनेटमध्ये गेल्यास हवं असलेले खाते मिळण्यास अडचणी निर्माण होतील. आधी मंत्रिमंडळात गेल्यानंतर पुन्हा हवं असलेल्या खात्यासाठी आवश्यक तेवढा दबाव निर्माण करता येणार नाही. मनासारखं खाते मिळाले नाही तर सहकाऱ्यांमध्ये चुकीचा संदेश जाण्याची शक्यता आहे. त्याशिवाय, विरोधकही या चुकीचा फायदा उचलून टीका करतील असा होरा शिंदेंचा असल्याचे राजकीय विश्लेषकांनी सांगितले.

बुधवारी रात्री देवेंद्र फडणवीस यांनी एकनाथ शिंदे यांची भेट घेतली. यावेळी मुख्यमंत्रीपदाच्या बदल्यात एकनाथ शिंदेंनी गृहखात्याची मागणी केली. ती मागणी पूर्ण केली तरच उपमुख्यमंत्रीपदी शपथ घेतली जाईल अशी अटच एकनाथ शिंदेंनी घातली. त्यावर देवेंद्र फडणवीस यांनी आपण पक्षाच्या हायकमांडसोबत बोलू असे सांगितले. दिल्लीशी बोलून त्यांनी होकार दिला तरच तुमच्या मागण्या पूर्ण होतील, असे फडणवीस यांनी एकनाथ शिंदेंना सांगितले असल्याचे सूत्रांनी सांगितले.