'विझलो जरी मी...', पत्नीचा नगरपालिकेत पराभव, दुसऱ्याच दिवशी कट्टर मनसे नेत्याचा मृत्यू, वाशीममध्ये हळहळ!

बुधवारी रात्री ९ वाजेच्या सुमारास कारंजा-वाशिम बायपास जवळील रिलायन्स पेट्रोल पंपाजवळ हा भीषण अपघात झाला. हरिश हेडा यांनी आपल्या मुलीला शिकवणी वर्गातून घरी सोडले आणि त्यानंतर काही कामासाठी ते बायपासच्या दिशेने गेले होते. यावेळी एका भरधाव पिक-अप वाहनाने त्यांच्या दुचाकीला जोरदार धडक दिली. ही धडक इतकी भीषण होती की, हरिश हेडा यांचा जागीच मृत्यू झाला.

कारंजा नगरपालिकेच्या नगराध्यक्षपदाच्या निवडणुकीत हरिश हेडा यांच्या पत्नी अलका हेडा रिंगणात होत्या. दोन दिवसांपूर्वीच या निवडणुकीचा निकाल लागला, ज्यामध्ये त्यांचा पराभव झाला. राजकीय आयुष्यातील या धक्क्याने खचून न जाता, हरिश हेडा यांनी मंगळवारी सोशल मीडियावर एक अतिशय सकारात्मक पोस्ट शेअर केली. मतदारांचे आभार मानत त्यांनी पुन्हा लढण्याची जिद्द व्यक्त केली. या पोस्टनंतर २४ तासांच्या आत त्यांच्या मृत्यूची बातमी धडकल्याने सर्वत्र हळहळ व्यक्त होत आहे.

हरिश हेडा हे राज ठाकरे यांच्या विचारांनी प्रेरित होऊन २००८ पासून मनसेमध्ये सक्रिय होते. पक्षाच्या पडत्या काळातही त्यांनी कारंजा शहरात मनसेचा झेंडा हाती ठेवला होता. एक निष्ठावान कार्यकर्ता गमावल्याने मनसे कार्यकर्त्यांमध्ये दुःखाचे वातावरण आहे.