राज्याच्या गावगाड्यावरील प्रचाराच्या तोफा सोमवारी थंडावणार; मतदारापर्यंत पोहोचण्यासाठी उमेदवारांची पायाला भिंगरी

राज्यात अखेर स्थानिक स्वराज्य संस्थांच्या निवडणुकांचा बिगुल वाजला आहे. राज्य निवडणूक आयोगाने २४६ नगरपरिषदा आणि 42 नगरपंचायतींच्या सार्वत्रिक निवडणुकीचा कार्यक्रम जाहीर केला आहे. या घोषणेनुसार मतदान 2 डिसेंबरला होणार आहे तर निकाल 3 डिसेंबरला होणार आहे. जाहीर प्रचाराची मुदत ‘महाराष्ट्र नगरपरिषद, नगरपंचायत व औद्योगिक नगरी अधिनियम 1965’ मधील तरतुदीनुसार 1 डिसेंबर 2025 रोजी रात्री 10 पर्यंत असेल. निवडणुकीसाठी सुरू असलेल्या प्रचारांच्या तोफा रात्री 10 वाजता थंडावणार आहेत. महिनाभरापासून सुरू असलेले राजकीय आरोप-प्रत्यारोप, राजकीय पक्षांची एकमेकांवर सुरू असलेली चिखलफेक थांबणार आहे.

राज्यातील स्थानिक स्वराज्य संस्थांच्या निवडणुकांस संबंधित कायद्यांमधील तरतुदींनुसार घेतल्या जातात. नगरपरिषदा व नगरपंचायतींच्या निवडणुकांसंदर्भातील कायद्यात जाहीर प्रचाराचा कालावधी निश्चित करण्यात आला आहे. त्यानुसार मतदान सुरू होण्याच्या अगोदरच्या दिवशी म्हणजे 1 डिसेंबर 2025 रोजी रात्री 10 वाजल्यापासून प्रचार पूर्णपणे बंद होईल. त्यानंतर प्रचारसभा, मोर्चे आणि ध्वनिक्षेपकाचा वापर करता येणार नाही. त्याचबरोबर निवडणूक प्रचाराशी संबंधित जाहिरातींची प्रसिद्धी किंवा प्रसारण करता येणार नाही.  या निवडणुकीतून एकूण 6859 सदस्य आणि 288 नगराध्यक्ष निवडले जाणार असून, राज्यात आता राजकीय वातावरण तापायला सुरुवात झाली आहे.

राज्यातील सर्वच नगर परिषद आणि नगर पंचायतीची विहित मुदत संपुष्टात आली होती. आधी ओबीसी आरक्षण आणि नंतर काही तांत्रिक कारणाने गेल्या दोन ते तीन वर्षांपासून निवडणुका रखडलेल्या होत्या. मात्र सर्वोच्च न्यायालयाच्या आदेशानंतर स्थानिक स्वराज्य संस्थांच्या निवडणुका मार्ग मोकळा झाला असून आता लवकरच नगराध्यक्ष मिळणार आहे.