Nagpur News: गाडीत रक्ताचे डाग अन् आरोपी बेपत्ता; सना खान प्रकरणाच्या तपासासाठी नागपूर पोलीस जबलपूरला रवाना

जबलपूर येथील गुंड पप्पू साहू याच्याबरोबर लग्नानंतर सना खान यांचे वाद झाले होते. पप्पू साहू याच्या नोकरालाही पोलिसांनी याआधी ताब्यात घेतलं होतं. पप्पू साहू याच्या कारमधून रक्ताचे डाग धुवून काढल्याची माहिती नोकराने यावेळी दिली होती.

सना खान ह्या नागपूर पश्चिम महिला भाजपच्या पदाधिकारी असून त्या मागील आठ दिवसापासून बेपत्ता होत्या. त्यांना जबलपूर येथून एका व्यक्तीने जीवे मारण्याची धमकी दिली होती. त्यानंतर त्या एक ऑगस्टपासून बेपत्ता असल्याची तक्रार सना खान यांच्या आईने मानकापूर पोलीस स्टेशनमध्ये केली होती.

अखेर सना खान यांचा खून झाल्याचं निष्पन्न झालं. पप्पू साहूच्या नोकराने कबुली दिली की त्याने गाडीच्या डिक्कीतील रक्त साफ केलं होतं. यासोबतच मृतदेह हिरन नदीत फेकल्याचेही त्याने सांगितले.  सनाच्या हत्याकांडात मुख्य आरोपी पप्पू साहू याच्याविरोधात आता नागपुरात गुन्हा दाखल करण्यात आला आहे. मात्र, अमित उर्फ पप्पू हा फरार झाला असून त्याने ढाब्यालाही कुलूप लावलं आहे .