Ashok Chavan : मराठा-धनगर आरक्षणाला विरोध असलेलं बनावट लेटरपॅड व्हायरल; अशोक चव्हाणांची पहिली प्रतिक्रिया

मराठा आणि धनगर समाजाच्या आरक्षणाला आपला विरोध असल्याचा आशय त्या लेटरपॅडवर असुन ते तत्कालीन मुख्यमंत्री उध्दव ठाकरे यांच्या नावाने लिहण्यात आल्याचे अशोक चव्हाण म्हणाले. याबाबत अशोक चव्हाण यांनी पोलिसात तक्रार दाखल केली. या प्रकरणाचा तपास करण्याची मागणी त्यांनी केली. याआधीही चव्हाणांचे सार्वजनिक बांधकाम मंत्र्यांचे लेटरपॅड वापरून मराठा आरक्षणाविरोधीचे पत्र व्हायरल करण्यात आले होते. याबाबत 20 फेब्रुवारी 2023 रोजी अशोक चव्हाणांनी दिलेल्या तक्रारीनुसार नांदेड पोलिसांनी गुन्हा दाखल केला होता. आता पुन्हा असाच प्रकार घडला आहे. आपल्या राजकीय विरोधकाकडून हा प्रकार सुरू असून आपल्या विरोधात आणखी काही षडयंत्र रचण्यात आल्याची शक्यता अशोक चव्हाण यांनी व्यक्त केली. आगामी काळात निवडणुका असून गैरसमज निर्माण करून बदनामी करण्याचे हे काम असल्याचे अशोक चव्हाण म्हणाले.