Nanded Lok Sabha : मराठा आंदोलन, मतदानाचा टक्का घसरला.. नांदेडमध्ये कुणाची होणार सरशी? कसं आहे गणित?

ऐन लोकसभा निवडणुकीच्या तोंडावर नांदेडचे दिग्गज नेते अशोक चव्हाण यांनी काँगेस सोडून भाजपात प्रवेश केला. नांदेड जिल्ह्यातील भोकर मतदार संघातून अशोक चव्हाण आमदार होते. आपल्या आमदारकीचा राजीनामा देऊन त्यांनी भाजपात प्रवेश केला. भाजपाने त्याना राज्यसभा दिली. अर्थात बेरजेचे गणित खेळत भाजपाने अशोक चव्हाण यांना पक्षात घेतले. नांदेडसह मराठवड्यात अशोक चव्हाण यांच्यामुळे पक्षाला फायदा होईल अशी भाजपाची आशा होती. अशोक चव्हाण भाजपात आल्याने नांदेडची लढत एकतर्फी होईल असं सुरुवातीला वाटत होतं. मात्र, नांदेड जिल्ह्यात अशोक चव्हाण यांच्या भाजपा प्रवेशाचे जास्त स्वागत झाले नाही.

मराठवाड्यातील अन्य जिल्ह्यासह नांदेडमध्ये देखील मराठा आरक्षण आंदोलनाची तीव्रता अधिक होती. लोकसभा निवडणुकीच्या पूर्वी आणि निवडणुकीदरम्यान सर्व पक्षीय नेत्यांची मराठा समाजाकडून अडवणूक झाली. खासदर प्रताप पाटील चिखलीकर, काँगेसचे आमदार मोहन हंबर्डे, शिंदे गटाचे आमदार बालाजी कल्याणकर यांच्या गाड्या फोडण्यात आल्या. लोकसभा निवडणुकीच्या प्रचारा दरम्यान अशोक चव्हाण यांना देखील प्रचंड विरोध झाला. अशोक चव्हाण यांच्या भोकर विधानसभा मतदारसंघात अशोक चव्हाण यांच्या गाड्या अडवण्यात आल्या. त्यांच्या पत्नी अमिता चव्हाण आणि अशोक चव्हाण यांची राजकीय वारस श्रीजया चव्हाण यांना देखील मराठा आंदोलकांच्या रोषाचा सामना करावा लागला. चिखलीकर यांच्या कुटुंबियाला देखील अनेक गावात अडवण्यात आले. अर्थात मराठा आरक्षण आंदोलनाचा फटका देखील भाजपाला बसण्याची शक्यता आहे.

नांदेड लोकसभेची जागा जिंकण्यासाठी भाजपाने यंदा अधिक जोर लावला. पंतप्रधान नरेंद्र मोदी, केंद्रिय गृहमंत्री अमित शहा, केंद्रिय मंत्री नितीन गडकरी यांनी देखील नांदेड मध्ये भाजपा उमेदवार प्रताप पाटील चिखलीकर यांच्या प्रचारार्थ सभा घेतल्या. राज्य पातळीवरील अनेक नेत्यांनी प्रचार सभा घेतल्या. उपमुख्यमंत्री देवेंद्र फडणवीस यांनी जिल्ह्यात चार वेळा दौरा करुन प्रचार सभा घेतल्या. विशेष म्हणजे अशोक चव्हाण यांनी अख्खा मतदार संघ पिंजून काढला. भाजपाच्या तुलनेत मात्र काँगेस नेत्यांची तशी लगबग दिसून आली नाही. प्रदेश अध्यक्ष नाना पटोले, काँगेस नेते बाळासाहेब थोरात, अमित देशमुख यांच्यासह अन्य नेत्यांनी प्रचार सभा घेतल्या.

2019 साली नांदेड लोकसभेत वंचितचे उमेदवार यशपाल भिंगे यांनी एक लाख साठ हजार मत घेतली होती. काँगेसचे उमेदवार अशोक चव्हाण यांचा 40 हजार मतांनी पराभव झाला होता. यंदा मात्र नांदेड मध्ये वंचित फॅक्टर चालला नाही. प्रकाश आंबेडकर यांच्या नावाने काही प्रमानात वंचितला मत गेली. मात्र, मतांचं जास्त धृवीकरण न झाल्याने भाजपाला त्याचा फटका बसण्याची शक्यता आहे.

यंदाच्या नांदेड लोकसभा निवडणुकीत मराठा आणि मुस्लिम मतांची टक्केवारी वाढली आहे. मुस्लिम बाहुल आणि मराठा बाहुल गावात मतदानासाठी मोठ्या रांगा लागल्या होत्या. या मतांचा फायदा कोणाला आणि नुकसान कोणाला हे आताच सांगता येणार नाही.

मतदान टक्केवारी 65.18