50 वर्षांची परंपरा, नाशिकची ओम बजरंग मिसळ बनली खवय्यांची फेवरेट, तुफान प्रतिसाद, वेळ अन् लोकेशन काय, VIDEO

नाशिक - नाशिक शहरातील खाद्यसंस्कृती ही सर्वत्र प्रसिद्ध आहे. येथील अनेक खाद्यपदार्थ लोकप्रिय होत आहेत. यातच म्हणजे येथील मिसळसुद्धा आता सर्वत्र प्रसिद्ध आहे. आता शहरात शेकडो ठिकाणी मिसळ विक्री केली जात आहे. यामध्ये एक व्यक्ती अशी आहे, जे 1974 पासून म्हणजे तब्बल 50 वर्षांपासून मिसळविक्रीचा व्यवसाय करत आहेत. ओम बजरंग मिसळ असे या मिसळचे नाव आहे. याचबाबत लोकल18 च्या टीमने घेतलेला आढावा.

नाशिकमध्ये काही ठिकाणी घरगुती काळ्या मसाल्याचा वापर करुन बनवलेली मिसळ खायला मिळते. त्यातीलच एक म्हणजे शहरातील अशोक स्तंभ येथील ओम बजरंग मिसळ आहे. मागील 50 वर्षांपासून ही मिसळ नाशिककर खवय्यांच्या पसंतीस उतरली आहे. ओम बजरंग मिसळचे अमोल सोनवणे यांनी याबाबत लोकल18 शी बोलताना माहिती दिली.

यावेळी ते म्हणाले की, 1974 मध्ये अशोक सोनवणे यांनी नाशिक येथील जिल्हा न्यायालयाच्या प्रवेश द्वारासमोर बजरंग मिसळची सुरुवात केली. त्याकाळी न्यायालयीन काम आणि इतर कारणांसाठी सीबीएसला येणाऱ्या जिल्हाभरातील खवय्यांसाठी ही मिसळ पसंतीची बनली.

सुरुवातीला भाकरी रस्साच्या स्वरुपात असलेल्या मिसळमध्ये हळूहळू बदल होत गेले आणि भाकरीच्या जागी पाव आला. मिसळसाठी वापरण्यात येणाऱ्या घरगुती काळ्या मसाल्याच्या या मिसळने आता खवय्यांच्या जीभेवर राज्य केले आहे.