Nawab Malik : नवाब मलिक अजितदादांच्या भेटीला, एक तासाच्या चर्चेत काय झालं? तटकरेंनी सांगितलं

मुंबई, 26 डिसेंबर : राष्ट्रवादी काँग्रेसचे आमदार नवाब मलिक यांनी उपमुख्यमंत्री अजित पवार यांची भेट घेतली आहे. अजित पवार यांच्या देवगिरी बंगल्यावर दोन्ही नेत्यांमध्ये 1 तास चर्चा झाली. नवाब मलिक यांच्यासोबत त्यांची कन्या सना मलिकही होत्या. मतदारसंघातील नागरिकांच्या प्रलंबित कामांबाबतची निवेदन दोघांनीही अजित पवारांना दिली, तसंच राष्ट्रवादी सत्तेत असूनही काम होत नसल्यामुळे नाराजी व्यक्त केल्याची माहितीही सूत्रांनी दिली आहे.

वैद्यकीय कारणांमुळे नवाब मलिक यांना कोर्टाने जामीन दिला, त्यानंतर मलिक नागपूरमध्ये झालेल्या हिवाळी अधिवेशनासाठी उपस्थित राहिले. अधिवेशनावेळी मलिक राष्ट्रवादीच्या सत्ताधाऱ्यांच्या बाकावर बसले, त्यामुळे मोठा वाद निर्माण झाला, यानंतर उपमुख्यमंत्री देवेंद्र फडणवीस यांनी मलिकांना सोबत घ्यायला विरोध असल्याचं स्पष्ट केलं. फडणवीस यांनी याबाबतचं पत्र सोशल मीडियावर पोस्ट केलं.