मनोज जरांगे लढत असताना तुम्ही काय करताय? पाठिंबा का नाही? ओमराजेंच्या कार्यालयाबाहेर मराठा आंदोलक आक्रमक

अंतरवाली सराटी येथे गेल्या पाच दिवसांपासून मनोज जरांगे आंदोलन करीत आहे. त्यांची प्रकृती आंदोलन करण्यासाठी साथ देत नसताना लोकप्रतिनिधी आरक्षणाच्या समर्थनार्थ भूमिका का घेत नाही? असे सवाल करून आंदोलकर्त्यांनी जोरदार घोषणाबाजी करत ठिय्या आंदोलन सुरू केले.

खासदार ओमराजे निंबाळकर यांनी लवकरात लवकर आरक्षणप्रश्नी आपली भूमिका स्पष्ट करून मनोज जरांगे यांच्या भेटीला जागे तसेच सहयोगी खासदारांना देखील यासंबंधी अवगत करावे. राज्यातील मराठा समाजाच्या अस्तित्वाचा लढा सुरू असताना राज्यव्यापी आंदोलनाकडे दुर्लक्ष करू नये, अशा मागण्या आंदोलकांनी यावेळी केल्या. तसेच जोपर्यंत ओमराजेंच्या भूमिकेचे पत्र मिळत नाही तोपर्यंत हे ठिय्या आंदोलन सुरू ठेवण्याचा निर्धार आंदोलकांनी केला आहे.

दरम्यान, आंदोलकांच्या आक्रमक पवित्र्याने खासदार ओमराजे निंबाळकर काहीसे संकटात सापडले आहेत. विधानसभा निवडणुकीच्या तोंडावर एका समाजाच्या समर्थनार्थ भूमिका घेऊन दुसऱ्या समाजाची नाराजी ओढावून घेणे शिवसेना पक्षाला परवडणारे नाही, हे ओमराजे यांना पक्के माहिती असल्याने ते काय भूमिका घेतात आणि यातून कसा मार्ग काढतात? याकडे सर्वांचं लक्ष असेल.