सहलीसाठी गोव्याला निघालेल्या वसईतील पोलिसांकडून तरुणीच्या अपहरणाचा प्रयत्न; ग्रामस्थांनी बेदम चोपलं, 5 जणांना अटक

सिंधुदुर्ग, प्रतिनिधी : एक धक्कादायक घटना समोर आली आहे, या घटनेनं खळबळ उडाली आहे. कायद्याचे रक्षकच भक्षक निघाले आहेत. गोव्याला सहलीसाठी जात असताना वसई येथील पोलिसांनी वाटेत एका तरुणीचा विनयभंग केला, तसेच तिच्या अपहरणाचा प्रयत्न केला. ही घटना लक्षात येताच संतप्त ग्रामस्थांनी दोन पोलिसांसह पाच जणांना मारहाण केली, तसेच त्यांना पोलिसांच्या ताब्यात दिलं. ही घटना सिंधुदुर्ग जिल्ह्यातल्या जामसंडेमध्ये घडली आहे. या घटनेची गंभीर दखल घेत देवगड पोलिसांनी आरोपींना अटक केली. दरम्यान त्यानंतर पोलीस आयुक्तांनी या घटनेची तातडीनं दखल घेऊन या दोन आरोपी पोलिसांवर कारवाई केली. त्यांना निलंबित करण्यात आलं आहे. घटनेबाबत अधिक तपास सुरू असल्याची माहिती पोलिसांकडून देण्यात आली आहे.