झेंड्याला सॅल्युट केलं अन् फोटो काढताना काळाने झडप घातली, पोलीस अधिकाऱ्याचा मृत्यू, VIDEO

धाराशिव जिल्ह्यातील उमरगा तालुक्यातील तलमोड इथं दारूबंदी अबकारी अधिकारी मोहन जाधव यांचा झेंडा वंदन करताना हृदयविकाराच्या तीव्र धक्याने मृत्यू झाला. 26 जानेवारी प्रजासत्ताक दिनाच्या दिवशीचा कार्यक्रम सुरू असताना त्यांना अचानक ह्रदयविकाराचा अटॅक आला आणि जागेवर कोसळले.

प्रजासत्ताक दिनानिमित्ताने ध्वजारोहण सोहळा पार पडला होता. त्यानंतर सगळे अधिकारी आणि कर्मचारी हे फोटो काढण्यासाठी रांगेत उभे होते. मोहन जाधव सुद्धा याच रांगेत उभे होते. पण, अचानक मोहन जाधव कोसळले. मोहन जाधव अचानक कोसळल्यामुळे एकच खळबळ उडाली. त्यांच्या जवळ उभ्या असलेल्या सहकाऱ्यांनी तातडीने त्यांना उचललं आणि रुग्णालयात दाखल केलं. पण, डॉक्टरांनी तपासून त्यांना मृत घोषित केलं.

उमरगा तालुक्यातील तलमोड सीमा तपासणी नाक्यावर मोहन जाधव हे कार्यरत होते. ते मुळचे सोलापूर येथील रहिवासी होते. प्रजासत्ताक दिनाच्या दिवशी त्यांचा मृत्यू झाल्यामुळे संपूर्ण पोलीस दलामध्ये  हळहळ व्यक्त होत आहे. मोहन जाधव यांच्या ज्या क्षणी ह्रदयविकाराचा अटॅक आला होता, हा क्षण कॅमेरात कैद झाला आहे. या घटनेचा व्हिडिओ व्हायरल झाला आहे.