सांगली जिल्ह्यातील 84000 'लाडक्या बहिणी' होणार का अपात्र? मानधन तात्पुरतं स्थगित; पडताळणी सुरू!

'लाडकी बहीण' योजनेतील सर्व पात्र अर्जांची ओळख पडताळणी करण्यासाठी महिला व बालविकास विभागाने शासनाच्या विविध विभागांकडून माहिती मागवली आहे. यामध्ये काही लाभार्थी इतर शासकीय योजनांचा लाभ घेत असल्याचे, किंवा एकाच कुटुंबात दोनपेक्षा जास्त लाभार्थी असल्याचे निदर्शनास आले आहे. राज्यात आतापर्यंत मिळालेल्या माहितीच्या आधारे, जून 2025 पासून 26.34 लाख अर्जदारांचा लाभ तात्पुरता थांबवण्यात आला आहे. सांगली जिल्ह्यात अशा 84 हजार महिलांची चौकशी सुरू झाली आहे. यासाठी अंगणवाडी सेविका घरोघरी जाऊन चौकशी करणार आहेत.