वीरपत्नीच्या कपाळी तब्बल 21 वर्षांनी कुंकू, मुलीच्या लग्नावेळी काय घडलं? Video

नीता सावंत यांची कन्या शिवानीचा विवाह नुकताच कोंडवा येथील ननावरे कुटुंबात झाला आहे. मात्र या विवाहप्रसंगी लग्नपत्रिकेवर नीता सावंत यांच्या नावापुढे श्रीमती लागलेली गोष्ट त्यांच्या कुटुंबीयांना खटकली. एकुलत्या एक मुलीचा विवाह हा एकच त्यांच्या आयुष्यातील महत्त्वाचा दिवस होता. याप्रसंगी त्यांना विधवा म्हणून शुभकार्यापासून दूर राहावे लागणार होते. म्हणूनच नीता यांच्या जाऊबाई सुनिता यांनी नीता सावंत यांना सुवासिनीचा मान मिळवून देण्याचा विचार केला. हा विचार त्यांनी आपल्या कुटुंबियांना, नीता यांच्या मुलीच्या सासु-सासऱ्यांना आणि जय हिंद फाउंडेशन यांना सांगितला. सर्वांनीच या विचाराला दुजोरा देत प्रोत्साहन दिल्याची माहिती सुनिता सावंत यांनी दिली.

नीता सावंत यांची मुलगी शिवानीच्या लग्नाचा घाना भरणे आणि मुहुर्तमेढ कार्यक्रम 5 डिसेंबर रोजी पार पडला. लग्नाच्या पहिल्या विधी पासूनच नीता यांना सौभाग्याचा सन्मान मिळावा असा सुनिता यांचा आग्रह होता. त्यानुसारच. या घाना भरण्याच्या विधीवेळी सर्व महिलांकडून नीता सावंत यांना हळदी-कुंकू लावून त्यांना सन्मानित करन्यात आले. यावेळी त्यांना सौभाग्यवाण देण्यात आले. त्यामुळेच पुढे लग्नात आनंदाने सर्व शुभकार्य त्या करू शकल्या.

यावेळी 21 वर्षांनी जाऊबाई सुनिता आणि माझी मुलगी शिवानी यांच्यामुळेच हा अविस्मरणीय क्षण अनुभवता आला. त्यांनी पुढाकार घेऊनच हे सर्व घडवून आणल्यामुळे मला माझ्या मुलीच्या लग्नात सर्व कार्यात सहभागी होता आले, असे वीरपत्नी नीता सावंत यांनी सांगितले.

शिवानीचा विवाह सोहळा 8 डिसेंबर रोजी मोठ्या आनंदात पार पडला. याच प्रसंगी मुहुर्तमेढी वेळी आईचा सौभाग्यलेणं देऊन हळदी-कुंकू लाऊन सन्मान होणे ही एक आनंदाची आणि अभिमानाची गोष्ट आहे. प्रत्येक विधवा महिलेला असा सन्मान देऊन शुभकार्यात सहभागी करवून घेणे गरजेचे आहे, असे मत नीता यांची मुलगी शिवानी यांनी व्यक्त केले आहे.