शिवरायांचा पुतळा झाकला, शिवजयंतीच्या पूर्वसंध्येला नृत्यांगणाचा बिभत्स डान्स, कोल्हापुरातील घटनेचा VIDEO VIRAL

मिळालेल्या माहितीनुसार, वडणगे ग्रामपंचायत इमारतीसमोर शिवजयंतीच्या पूर्वसंध्येला एका सांस्कृतिक कार्यक्रमाचं आयोजन करण्यात आलं होतं. यासाठी तिथे एक मोठे स्टेज उभारण्यात आलं होतं. मात्र, या कार्यक्रमादरम्यान चक्क छत्रपती शिवाजी महाराजांच्या पुतळ्यासमोर पडदा लावून नृत्याचा कार्यक्रम उरकला गेल्याचा आरोप होत आहे. लावणीच्या नावाखाली 'ॲटम साँग्स'वर अत्यंत अश्लील आणि बिभत्स हालचाली करत नृत्यांगनांनी डान्स केल्याचं समोर आलं आहे.

शिवजयंती हा महाराष्ट्राचा अस्मितेचा सण आहे. अशा पवित्र उत्सवाच्या पूर्वसंध्येला शिवरायांचा पुतळा झाकून अश्लील कार्यक्रम करणे, हे अत्यंत निंदनीय असल्याचं स्थानिकांचं म्हणणं आहे. या घटनेचा व्हिडीओ समोर आला असून सोशल मीडियावर व्हायरल झाला आहे.

या वादावर ग्रामपंचायतीकडून स्पष्टीकरण देण्यात आलं आहे. हा कार्यक्रम महाशिवरात्री यात्रेनिमित्त आयोजित करण्यात आला होता, असं ग्रामपंचायतीचं म्हणणं आहे. मात्र, कार्यक्रमाचे स्वरूप आणि ज्या पद्धतीने महाराजांचा पुतळा झाकून हा अश्लील प्रकार घडला, त्यावर नागरिकांनी तीव्र आक्षेप नोंदवला आहे.