4 तासात उद्धव ठाकरेंना डबल धक्का, माजी आमदार दगडू सपकाळांनंतर आणखी एक निष्ठावंत शिलेदार फुटला

शिवसेना ठाकरे गटाचे माजी आमदार दगडू सपकाळ यांनी उद्धव ठाकरे यांच्यावर नाराजी व्यक्त करत मशालीला रामराम ठोकला आहे. त्यांनी एकनाथ शिंदे यांच्या नेतृत्वाखालील शिवसेनेत पक्ष प्रवेश केला आहे. या पक्षप्रवेशानंतर उद्धव ठाकरेंना दुसरा मोठा धक्का बसला आहे. शिवसेना ठाकरे गटाचे गोरेगाव येथील निष्ठावंत माजी नगरसेवक दिलीप शिंदे यांनी शिवसेना उद्धव बाळासाहेब ठाकरे गटाचा राजीनामा दिला आहे.

दिलीप शिंदे हे गोरेगावमधून सलग चार वेळा नगरसेवक होते. यावेळीही ते निवडणूक लढण्यास इच्छुक होते. मात्र मनसे-ठाकरे गट युतीमुळे त्यांना संधी मिळाली नाही. ज्या वॉर्डमधून दिलीप शिंदे निवडून येत होते, तो वॉर्ड यावेळी मनसेला सोडण्यात आला. तेव्हापासून दिलीप शिंदे पक्षात नाराज होते. आता मतदानाला पाच दिवस उरले असताना दिलीप शिंदे यांनी तडकाफडकी राजीनामा दिला आहे. राजीनाम्यानंतर दिलीप शिंदे कोणत्या पक्षात प्रवेश करणार याकडे सर्वांचे लक्ष लागलं आहे.

शिवसेना ठाकरे गटाचे माजी आमदार दगडू सकपाळ यांनी आज उपमुख्यमंत्री एकनाथ शिंदे यांच्या उपस्थितीमध्ये शिंदेंच्या शिवसेनेत प्रवेश केला. यावेळी मी छातीवर दगड ठेवून निर्णय घेतल्याचं दगडू सकपाळ म्हणाले. दगडू सकपाळ यांची मुलगी रेश्मा सकपाळ या शिवडी विधानसभेतील प्रभाग क्रमांक 203 मधून निवडणूक लढण्यास इच्छुक होत्या. परंतु ठाकरेंच्या शिवसेनेकडून त्यांना तिकिट देण्यात आलं नाही. त्यामुळेच दगडू सकपाळ नाराज होते. त्यानंतर आज त्यांनी शिंदे गटात पक्षप्रवेश केला.