बायकोवर परपुरूषाचं प्रेम, सोलापुरात जोडप्यानं संपवलं जीवन, चिठ्ठीत काळीज चिरणारी व्यथा

सोमनाथ धानोप्पा पाटील आणि श्रीदेवी सोमनाथ पाटील असं आत्महत्या केलेल्या पती-पत्नीचं नाव आहे. हे दाम्पत्य सोलापुरात वास्तव्यास होतं. त्यांचा किराणा मालाचा व्यवसाय होता. त्यांना दोन लहान मुलं आहेत. शुक्रवारी या दोघांनीही विष प्राशन करून आपलं आयुष्य संपवलं. घटनेच्या वेळी त्यांच्या तोंडातून फेस येत असल्याचे पाहून त्यांच्या मुलांनी तातडीने आपले काका नवनाथ पाटील यांना ही माहिती दिली. मात्र, दुर्दैवाने उपचारापूर्वीच दोघांचा मृत्यू झाला होता.

आत्महत्या करण्यापूर्वी सोमनाथ आणि श्रीदेवी यांनी एक सुसाईड नोट लिहून ठेवली होती. या चिठ्ठीमध्ये विजयपूर येथील अभिषेक कोरे या व्यक्तीच्या नावाचा स्पष्ट उल्लेख करण्यात आला आहे. अभिषेक कोरे हा श्रीदेवी पाटील यांच्यावर एकतर्फी प्रेम करत होता. यातून तो वारंवार त्यांना फोन करून आणि भेटून त्रास देत होता. तसेच या दाम्पत्याला समाजात बदनाम करण्याची धमकी देखील त्याने दिली होती.

आरोपी अभिषेक कोरेच्या जाचाला आणि त्रासाला कंटाळून अखेर पाटील दाम्पत्याने टोकाचं पाऊल उचलण्याचा निर्णय घेतला. याप्रकरणी सोलापूर एमआयडीसी पोलिसांनी तातडीने सूत्रं हलवली. सुसाईड नोटमधील नावाच्या आधारे पोलिसांनी संशयित आरोपी अभिषेक कोरे याला विजयपूर येथून ताब्यात घेतलं आहे. याप्रकरणी एमआयडीसी पोलीस ठाण्यात गुन्हा दाखल करण्यात आला असून अधिक तपास सुरू आहे.