'मेल्यावर माझी कुणी आठवण...', सोलापुरात इन्स्टा स्टोरी ठेवत 18 वर्षीय तरुणाने संपवलं

योगेश अशोक ख्यागे असं आत्महत्या करणाऱ्या १८ वर्षीय तरुणाचं नाव आहे. त्यानं असं अचानक टोकाचं पाऊल उचलल्याने कुटुंबीयांवर दु:खाचा डोंगर कोसळला आहे. त्याने प्रेम प्रकरणातून अशाप्रकारचं पाऊल उचललं असावं, अशी शक्यता वर्तवली जात आहे. सविस्तर तपास सुरू आहे.

आत्महत्येसारखे टोकाचे पाऊल उचलण्यापूर्वी योगेशने आपल्या इन्स्टाग्राम अकाउंटवर एक हृदयद्रावक स्टोरी अपलोड केली होती, जी सध्या चर्चेचा विषय ठरत आहे. त्याने स्टोरीमध्ये म्हटलं होतं की, “मरायच्या आधी सर्वांच्या मनातून उतरून जायचं आहे मला... जेणेकरून मी मेल्यानंतर कोणी माझी आठवण नाही काढली पाहिजे..!!”

मिळालेल्या माहितीनुसार, मयत योगेश एका बेकरी दुकानात काम करत होता. तर त्याचे वडील वॉचमन म्हणून काम करतात. घटनेच्या वेळी योगेशचे आई-वडील नातेवाईकांकडे गेले होते. तो घरात एकटाच होता. योगेशने गळफास घेतल्याचे लक्षात येताच नातेवाईकांनी त्याला तत्काळ खाली उतरवले. बेशुद्ध अवस्थेत असलेल्या योगेशला तातडीने सोलापूर येथील शासकीय रुग्णालयात दाखल करण्यात आले. मात्र, उपचारापूर्वीच डॉक्टरांनी त्याला मृत घोषित केले.

योगेश ख्यागे याने आत्महत्येसारखे टोकाचे पाऊल कोणत्या कारणामुळे उचललं, याचं नेमकं कारण अद्याप समोर आलं नाही. प्रेमसंबंध, कामाचा ताण, किंवा अन्य कोणत्याही कौटुंबिक कारणामुळे त्याने असं टोकाचं पाऊल उचललं असावे, अशा चर्चा परिसरात सुरू आहेत. घटनेचा पुढील तपास केला जात आहे.