Raksha Bandhan 2025: मूकबधिर विद्यार्थ्यांची कमाल, बनवल्या पर्यावरणपूरक राख्या, सोलापुरमधील शाळेतील उपक्रम, Video

ममता मूकबधिर विद्यालयामध्ये गेल्या अनेक वर्षांपासून हस्तकलेच्या माध्यमातून राख्या बनवणे तसेच दिवाळीमध्ये आकर्षक आकाश कंदील बनवणे, पणती तयार करणे आणि मूकबधिर विद्यार्थ्यांच्या हस्ते गणपती तयार करणे असे वेगवेगळे उपक्रम या शाळेत राबवले जातात. साइन लँग्वेजच्या माध्यमातून शिक्षक आणि विद्यार्थी राख्या बनवतात.

राखी पौर्णिमा सणाच्या एक महिन्या अगोदरपासून ममता मूकबधिर विद्यालयात राख्या बनवण्याच्या कामाला सुरुवात होते आणि हे राख्या पर्यावरणपूरक असतात. मोतीचे खडे, चमकीचा दोरा, सुती दोरा, फेविकॉल अशा विविध साहित्याचा वापर करून आकर्षक अशा राख्या बनवल्या जातात. तर या उपक्रमामध्ये जवळपास 25 ते 30 विद्यार्थी आणि विद्यार्थिनी सहभाग घेतात. तर आतापर्यंत मूकबधिर विद्यार्थ्यांनी जवळपास 100 पेक्षा अधिक पर्यावरणपूरक राख्या बनवल्या असल्याची माहिती शिक्षिका मेधा जोशी यांनी दिली.

मूकबधिर विद्यार्थी विद्यार्थिनींना पुढील जीवनात हस्तकलेच्या माध्यमातून व्यवसाय दृष्टिकोन निर्माण करून दिला जात आहे. कोणावरही अवलंबून न राहता मूकबधिर विद्यार्थी विद्यार्थिनींनी आपला स्वतःचा व्यवसाय स्वतः सुरू करून स्वतःच्या पायावर उभे राहावे. हेच उद्दिष्ट डोळ्यासमोर ठेवून ममता मूकबधिर विद्यालयात विद्यार्थ्यांना हस्तकला शिकवली जात आहे. विद्यार्थी देखील मोठ्या उत्साहात यामध्ये सहभाग नोंदवून आपले कलागुण सादर करत आहेत.