Wheelchair : भंगारातून एक एक साहित्य घेतलं, दिव्यांगासाठी बनवली व्हीलचेअर, खास VIDEO

सोलापूर शहरातील फारुक सय्यद यांनी भंगारातील साहित्य वापरून एक व्हीलचेअर तयार केली आहे. जी थेट पायऱ्यांवरून वर आणि खाली जाऊ शकते. वृद्ध, दिव्यांग आणि रुग्णांसाठी मोठा अडथळा ठरलेल्या पायऱ्या आता यामुळे सहज पार करता येणार आहेत. या व्हीलचेअरचा वापर करताना वापरणाऱ्याला उठण्याची गरज भासत नाही आणि केवळ एका व्यक्तीच्या सहाय्याने पहिल्या मजल्यावर नेणे शक्य होते.

हे व्हीलचेअर बनवण्यासाठी फारुक सय्यद यांना दोन वर्षांचा कालावधी लागला आहे. तर यासाठी फारुक सय्यद यांना 15 हजार रुपये पर्यंत खर्च आला आहे. हा खर्च कमी करून स्वस्तात स्वस्त दिव्यांग आणि वृद्ध लोकांना हा व्हीलचेअर कसा देता येईल यावर फारुक सय्यद सध्या काम करत आहे.

लोकसहभागातून आणि स्थानिक प्रशासनाच्या मदतीने अशा उपक्रमांचे उत्पादन आणि प्रसार वाढवला गेला, तर अनेकांच्या जीवनात खऱ्या अर्थाने सुलभता आणता येईल, असे ते म्हणतात. 

या अनोख्या व्हीलचेअरच्या निर्मितीसाठी त्यांनी जुन्या सायकलचे सीट स्प्रिंग, नट-बोल्ट, दुचाकीचे शॉकऍब्सॉर्बर, दवाखान्यातील स्ट्रेचरचे व्हील, प्लायवूड, फायबर शीट्स आणि सायकलचे इतर सुटे भाग वापरले. केवळ पुनर्वापरातून निर्माण झालेली ही यंत्रणा पर्यावरणपूरक असून, जुनं ते सोनं हे वाक्य सार्थ करणारी आहे. तरी या व्हीलचेअरचा पेटंट सुद्धा नोंदणी करणार असल्याचेही माहिती फारुक सय्यद यांनी लोकल 18 शी बोलताना दिली.