5 एकर जमीन विकली, पत्नीचे मंगळसूत्र गहाण ठेवले, सोलापुरातील प्रसाद बनला बेघरांचा सहारा

सोलापूर : कोणाला मुल नाही,कोणी बेघर आहे. कोणाला त्यांची मुल संभाळत नाहीत अशा सर्वांचा संभाळ सोलापुरातील प्रसाद मोहिते हा तरुण करत आहे. यासाठी त्यांनी पाच एकर शेत विकून आणि पत्नीचे मंगळसूत्र गहाण ठेवून प्रार्थना फाउंडेशन उभारले आहे. याठिकाणी 70 जणांची देखभाल मोहिते दाम्पत्य करत आहे.

सोलापूर जिल्ह्यातील बार्शी तालुक्यातील वैराग गावाजवळील ईर्लेवाडी हे प्रसाद मोहितेचं मूळ गाव. मुळात प्रसाद हा आत्महत्याग्रस्त कुटुंबातला. वडिलांच्या निधनानंतर आईच्या पदराखाली वाढलेला. महाविद्यालयीन शिक्षणासाठी तो पुढे शहरात स्थायिक झाला. त्यावेळी शहरात असंख्य निराधार मुलं शिक्षण सोडून पोटासाठी भटकंती करताना दिसली. या मुलांना शिक्षणाच्या प्रवाहात यावं यासाठी काहीतरी करावे, असा विचार त्याच्या डोक्यात येऊ लागला. सामाजिक कार्यात काम करत असताना प्रसाद आणि अनुची ओळख झाली. ते दोघेही एमएसडब्ल्यूचे शिक्षण घेत होते. सामाजिक जाणीवेतूनच त्यांनी समाज कार्याला सुरुवात केली.