सुवर्णपदक विजेत्या कुस्तीपटूवर शेळ्या राखण्याची वेळ, सोलापुरातील धक्कादायक वास्तव

सोलापूर : ग्रामीण भागातील अनेक जण विविध क्रीडा प्रकारात राज्याचे, देशाचे नाव मोठे करतात. विविध क्रीडा पदके जिंकत देशाला सन्मान मिळवून देतात. मात्र, नंतरच्या काळात त्यांना कुठलीही शासकीय मदत मिळत नाही. अशामुळे अशा खेळाडूंना अत्यंत हालाखीचे जीवन जगावे लागते. देशपातळीवर कुस्तीचे मैदान मारून सुवर्णपदक मिळवलेल्या मोहोळ तालुक्यातील हराळवाडी येथील कुस्तीपटूवर आज शेळ्या राखून संसाराचा गाडा चालविण्याची वेळ आली आहे. देशपातळीवर गावाचे आणि जिल्ह्याचे नाव गजविणारा हा कुस्तीपटू हलाखीचे जीवन जगत आहेत.

मोहोळ तालुक्यातील हराळवाडी येथील कुस्तीपटू वाल्मिक माने यांनी 1979 साली शिमला येथे झालेल्या रेसलिंग फेडरेशन ऑफ इंडियाच्या कुस्ती स्पर्धेत देशपातळीवर चौथा क्रमांक पटकावला होता. तर महाराष्ट्र राज्य कुस्तीगीर परिषदेच्या स्पर्धेत राज्य पातळीवर सुवर्णपदक पटकावले होते. पण काळाच्या ओघात माने यांच्यावर हालाखीचे जीवन जगत आहेत. त्यांच्यावर आता गावाकडे शेळ्या राखून घर चालवण्याची वेळ त्यांच्या आली आहे.

सोलापूरच्या सिद्धेश्वर आखाड्यातही त्यांनी कुस्तीची स्पर्धा लढली. एकनाथ धोडमिसे हे त्यांचे वस्ताद होते. त्यांच्या मार्गदर्शनाखाली वाल्मिकी माने यांनी राज्य व देश पातळीवर कुस्ती खेळली. पण सध्या संसाराचा गाडा ओढण्यासाठी पैलवान वाल्मिकी माने यांना रानात शेळ्या राखून जीवन जगावे लागत आहे. म्हणून त्यांना शासनाकडून मानधन सुरू करण्यात यावे, अशी मागणी केली जात आहे.