Nashik : ठाकरे गटातील वाद चव्हाट्यावर! पत्रकार परिषद सुरू असताना बड्या नेत्याची हकालपट्टी!

शिवसेना ठाकरे गटाचे उपनेते आणि नाशिक शहरमधील महत्त्वाचा चेहरा असलेले सुधाकर बडगुजर हे भाजपच्या वाटेवर असल्याच्या चर्चा सुरू आहेत. सुधाकर बडगुजर यांनी सोमवारी, नाशिकमध्ये मुख्यमंत्री देवेंद्र फडणवीस यांची भेट घेतली होती. आपण शहरातील समस्यांबाबत फडणवीसांना भेटलो असल्याचे त्यांनी सांगितले होते. त्यानंतर मंगळवारी त्यांनी आपण पक्षात नाराज आहोत, असे म्हटले. जिल्ह्यात पक्षाच्या नियुक्तीत विश्वासात घेण्यात आले नव्हते असेही त्यांनी म्हटले.

ठाकरे गटाचे नाशिकचे जिल्हाप्रमुख डी.जी. सूर्यवंशी यांनी आज पत्रकार परिषद बोलावली. या पत्रकार परिषदेला महानगरप्रमुख विलास शिंदे, खासदार राजाभाऊ वाजे, उपनेते सुनील बागुल, उपनेते दत्ता गायकवाड, माजी महापौर विनायक पांडे, माजी आमदार वसंत गीते आदी उपस्थित होते. मात्र, बडगुजर यांनी पूर्वनियोजित कार्यक्रम असल्याचे सांगत पत्रकार परिषदेला येणे टाळले.