प्रवाशांना मोठा दिलासा! अखेर 9 महिन्यांनी केडीएमटीच्या इलेक्ट्रिक बस धावल्या

ठाणे : केडीएमटीच्या (Kalyan Dombivli Municipal Transport) बस ताफ्यात दाखल झालेल्या इलेक्ट्रिक बस गेल्या काही महिन्यांपासून आगारातच धूळ खात होत्या. प्रवाशांना त्यांचा काहीच वापर नव्हता, यावरून प्रशासनावर वारंवार टीका होत होती. आता मात्र मागच्या 20 दिवसांपासून यातल्या 4 इलेक्ट्रिक बस रस्त्यावर धावू लागल्या आहेत. तर, उरलेल्या बस ऑगस्ट महिना अखेरीस रस्त्यावर उतरवण्याचा विचार असल्याचं कळतंय. त्यामुळे आता नागरिकांना जुन्या बसऐवजी नव्याकोऱ्या इलेक्ट्रिक बसनं प्रवास करता येणार आहे.

कल्याण-डोंबिवली महापालिकेतील परिवहनच्या बस जुनाट झाल्यानं त्या कधीही, कुठंही बंद पडतील, अशी भीती असते. त्यामुळे प्रवाशांना चांगली सेवा मिळावी आणि पर्यावरण संवर्धनाच्या दृष्टीनं ई-बसचा पर्याय निवडण्यात आला. केंद्र सरकारनं राज्यात इंधनावर चालणाऱ्या वाहनांची संख्या कमी करून विद्युत यंत्रणेवर चालणाऱ्या वाहनांचा वापर करण्याचे निर्देश दिले आहेत. मिळालेल्या माहितीनुसार, महापालिकेच्या ताफ्यात 15व्या वित्त आयोगाच्या माध्यमातून उपलब्ध झालेल्या निधीतून 207 विद्युत बस खरेदी करण्यात आल्या. यापैकी 10 बस मागील वर्षी नोव्हेंबर महिन्यात केडीएमटीच्या ताफ्यात दाखल झाल्या. परंतु काही कागदपत्रांची अपूर्तता आणि चार्जिंग स्टेशन नसल्यानं त्या आगारातच उभ्या होत्या.