तुम्ही जे टोमॅटो खाताय ते कचऱ्यातून तर आले नाही ना? मुंबईतला VIDEO व्हायरल

पावसामुळे देशभरात भाजीपाला आणि फळ पिकांचं मोठं नुकसान झालं आहे. अशा परिस्थितीत बाजारपेठांमध्ये टोमॅटोची आवक कमी झाली आहे. टोमॅटोचे नवी मुंबई, मुंबई या शहरात दर शंभरीपार गेल्याचं चित्र आहे. अशा परिस्थितीत मुंबईच्या दादर परिसरातून एक धक्कादायक व्हिडिओ समोर आला आहे. ज्यामध्ये दादर पश्चिम येथीलल मार्केटमध्ये कचऱ्यातून वेचून सडलेले टोमॅटो विकले जात असल्याचं दिसत आहे.

पावसाळा सुरू होताच टोमॅटोच्या दरांमध्ये सातत्याने वाढ होताना दिसत आहे. टोमॅटोचे दर शंभरी पार पोहोचले आहेत, आता टोमॅटो गतवर्षीचे रेकॉर्ड्स मोडणार का हे पाहणं महत्वाचं ठरणार आहे. राज्यातील नवी मुंबईमध्ये टोमॅटोचे दर शंभरीपार पोहोचले आहेत. काही दिवसांपूर्वी टोमॅटोचे दर 70 ते 80 रूपयांवर होते. आता आवक कमी असणाऱ्या बाजार समित्यांमध्ये शंभर किंवा त्याहून अधिक दर मिळत आहे. मुंबईत सगळ्या भाज्यांचे दर गगनाला भिडलेले आहेत.

गतवर्षी टोमॅटोचे दर 200 ते 250 रूपयांपर्यंत गेल्याचं आपण पाहिलं होते. तशीच काहीशी परिस्थिती यंदा देखील राज्यात आणि देशात निर्माण होवू शकतो. त्यामुळे बळीराजाला नक्कीच दिलासा मिळणार आहे.जेवण शाकाहारी असो वा मांसाहारी भारतीय लोक सातत्याने आहारात टोमॅटोचा वापर करत असतात. टोमॅटोविना भारतीय गृहिणींची रेसीपी पूर्ण होत नाही.आगामी काही दिवसांत पावसाची परिस्थिती अशीच राहिल्यास नवी मुंबई बाजार समितीत टोमॅटोचे दर 160 रूपयांपर्यंत जाण्याची शक्यता व्यापारी  वर्गाकडून व्यक्त केली जात आहे.