नेमके किती किमतीचे घर घ्यावे? सर्व जण ही एक चूक करतात; फक्त 3 नियम समजून घ्या अन् होम लोनचा डोंगर टाळा

घराची किंमत तुमच्या वार्षिक ‘टेक-होम’ उत्पन्नाच्या पाचपटांपेक्षा जास्त नसावी. यापेक्षा अधिक किमतीचे घर घेतल्यास कर्जाचा बोजा वाढून आर्थिक अडचणी निर्माण होऊ शकतात. आणखी एक महत्त्वाचा नियम म्हणजे मासिक ईएमआय ही कुटुंबाच्या एकूण निव्वळ उत्पन्नाच्या 35 टक्क्यांपेक्षा जास्त नसावी. यापेक्षा जास्त ईएमआय असल्यास अचानक उद्भवणाऱ्या आपत्कालीन परिस्थिती, वैद्यकीय गरजा किंवा नोकरीतील बदल यामुळे आर्थिक ताण वाढू शकतो.

घर खरेदी करण्यापूर्वी त्या घराच्या किमतीच्या किमान 50 टक्के रक्कम बचतीत असणे आवश्यक आहे. ही रक्कम केवळ डाउन पेमेंटसाठीच नव्हे, तर खरेदीनंतर आर्थिक स्थैर्य टिकवण्यासाठीही महत्त्वाची ठरते. बहुतांश तज्ज्ञ 35:15 हा फॉर्म्युला सुचवतात. म्हणजे घराच्या किमतीपैकी 35 टक्के रक्कम डाउन पेमेंट म्हणून भरावी आणि 15 टक्के रक्कम आपत्कालीन निधी म्हणून वेगळी ठेवावी. हा निधी कोणत्याही अनपेक्षित परिस्थितीत आर्थिक संरक्षण देतो.

होम लोन घेण्यापूर्वी कुटुंबासाठी किमान 50 लाख रुपयांचा आरोग्य विमा (मेडिकल इन्शुरन्स) आणि घराच्या किमतीएवढा टर्म लाइफ इन्शुरन्स असणे गरजेचे आहे. यामुळे कोणतीही अनपेक्षित घटना घडल्यास कुटुंबावर आर्थिक ओझे पडणार नाही. तसेच किमान पाच वर्षे त्या घरात राहण्याची योजना असल्यासच घर खरेदी करणे योग्य ठरते. जर दोन-तीन वर्षांत बदली किंवा स्थलांतराची शक्यता असेल, तर भाड्याने राहणे अधिक शहाणपणाचे ठरू शकते. कारण खरेदी-विक्री खर्च आणि व्याजाचा भार मोठा असतो.

समजा तुम्हाला 1 कोटी रुपयांचे घर घ्यायचे आहे. अशा वेळी कुटुंबाचे वार्षिक उत्पन्न किमान 25 लाख रुपये असावे आणि सुमारे 50 लाख रुपयांची बचत आधीपासून असावी. यापैकी 35 लाख रुपये डाउन पेमेंटसाठी आणि 15 लाख रुपये आपत्कालीन निधी म्हणून वेगळे ठेवावेत. जर हे शक्य नसेल, तर आधी उत्पन्न वाढवण्यावर आणि कौशल्य विकासावर लक्ष केंद्रित करणे अधिक योग्य ठरेल.