Food Business: आवडीसाठी काढली सवड, आता होतेय बक्कळ कमाई, शारदाताईंच्या मोदकांना परदेशातून मागणी

पिंपरीतील शारदा डांगे यांनी पारंपरिक पदार्थ बनवण्याच्या आवडीला व्यवसायात रूपांतरित केलं. 2018 सालापासून त्यांनी बाहेरच्या ऑर्डर्स घेण्यास सुरुवात करत स्वतःचा उद्योग उभारला. गणेशोत्सवाच्या काळात त्यांच्या उकडीच्या मोदकांना मोठ्या प्रमाणात मागणी असते. दिवाळीच्या फराळालाही ग्राहकांचा मोठा प्रतिसाद मिळतो. विशेष म्हणजे, त्यांचे पदार्थ पुण्यापुरते मर्यादित न राहता दुबई आणि अमेरिकेतही पोहोचले आहेत.

रत्नागिरी जिल्ह्यातील शारदा डांगे लग्नानंतर पिंपरीत स्थायिक झाल्या. पती अनिल नोकरी करतात, तर मुलगी अनिषा शिक्षण घेत आहे. लहानपणापासून उकडीचे मोदक बनवण्याची आवड असलेल्या शारदा यांनी त्या छंदालाच व्यवसायाचं रूप दिलं. त्यांच्या मोदकांच्या अनोख्या चवीमुळे गणेशोत्सवापुरतेच नव्हे, तर वर्षभर मागणी असते. मोदकांची मागणी पिंपरी-चिंचवडमधील मदर तेरेसा आश्रमासह विविध संस्थांकडूनही केली जाते. गणेशोत्सवाच्या 10 दिवसांत दररोज सुमारे 300 मोदकांचे बुकिंग होते.