सोने-चांदीच्या दरात मोठी उलथापालथ, सोमवारी किंमत घसरणार; पैसे तयार ठेवा अक्षय तृतीयेपूर्वी होणार फेरबदल

मागील आठवड्यात देशांतर्गत बाजारात मौल्यवान धातूंमध्ये मोठी घसरण दिसून आली. मल्टी कमोडिटी एक्सचेंजवर चांदी 32,663 रुपयांनी म्हणजेच 12.59 टक्क्यांनी घसरून 2.26 लाख रुपये प्रति किलोवर बंद झाली. तर सोने (Gold Price) 13,974 रुपयांनी म्हणजेच 8.82 टक्क्यांनी घसरून 1.44 लाख रुपये प्रति 10 ग्रॅमवर बंद झाले.

आठवड्याच्या मध्यात ही घसरण अधिक वाढली होती कारण अमेरिका, जपान, इंग्लंड आणि युरोपमधील केंद्रीय बँकांनी कच्च्या तेलाच्या वाढत्या किमती आणि महागाईबाबत चिंता व्यक्त केली. यामुळे लवकरच व्याजदर कपात होणार नाही, असा संकेत मिळाला. आंतरराष्ट्रीय बाजारातही सोने आणि चांदीत घसरण दिसून आली. चांदी वायदा 11.68 डॉलर म्हणजेच 14.36 टक्क्यांनी घसरून 69.66 डॉलर प्रति औंसवर आला, तर सोने 486.8 डॉलर म्हणजेच 9.6 टक्क्यांनी घसरून 4,574.9 डॉलर प्रति औंसवर पोहोचले.

तज्ज्ञांच्या मते येत्या आठवड्यांत सोने मर्यादित पट्ट्यात व्यवहार करू शकते आणि त्यात चढ-उतार कायम राहतील. मजबूत डॉलर आणि उच्च व्याजदर यामुळे सोन्याच्या रिकव्हरीवर दबाव आहे. अमेरिकन फेडरल रिझर्व्हने व्याजदर कपातीबाबत कठोर भूमिका घेतल्यामुळे आणि ऊर्जा किमती वाढल्यामुळे धोरणात सवलत मिळण्याची शक्यता 2026 पर्यंत पुढे ढकलली गेली आहे. ज्याचा परिणाम सोन्याच्या मागणीवर होत आहे.